“Лезги газетдиз” РД-дин здравоохраненидин министерстводин пресс-къуллугъди хабар гайивал, Дагъустанда коронавирусдин тIегъуьн пайда хьайидалай кьулухъ Каспийск шегьердин центральный больницадин коронавирус акатнавай ва стIалжемдик начагъ хьанвай кIвачерал залан дишегьлияр кьабулзавай аялрин кIвале 220 аял дуьньядал атана.
ТIугъвалдин сад лагьай лепе къарагъай чIавуз ина коронавирусдик зайиф хьанвай кIвачерал залан дишегьлияр кьабулзавай. Лепе зайиф хьайила, аялрин кIвали адетдин къайдада кIвалах давамарзавай.
Нубатдин, пуд лагьай лепе, алай йисан гатуз къарагъна. Аялрин кIвали мад адетдин тушир къайдада кIвалахиз гатIунна. Духтуррин гафаралди, ина жигерар 50-70 процентдин харапI хьанвай жегьил дидеяр къутармишай са шумуд дуьшуьш хьана. Пуд лагьай лепедин вахтунда лагьайтIа, 120 аялдиз экуь дуьнья акуна.
Министерстводин пресс-къуллугъдин векилди алава хъувурвал, пуд лагьай лепедин вахтунда кIвачерал залан дишегьлийрин арада коронавирус акатайбурун кьадар садлагьана гзаф хьана.
Алай вахтунда, шукур Аллагьдиз, тIегъуьндин камар яваш жезва.
«Лезги газет»
