Мукьвара Мегьарамдхуьруьн райондин кьил Фарид Агьмедова Дагъустандин намусдин азадвилин, диндин тешкилатрихъ галаз алакъа хуьнин рекьяй комитетдин векилрихъ галаз гуьруьш кьиле тухвана. “Лезги газетдиз” райондин администрациядин пресс-къуллугъди хабар гайивал, гуьруьшдин сергьятра аваз Фарид Агьмедова комитетдин государстводин гьукумдин ва муниципалитетрин тешкилатрин органрихъ галаз алакъа хуьдай отделдин начальник Сейфедин Велибеговахъ ва адан заместитель Ренат Мегьамедовахъ галаз чIехи алим ва философ, шейх Ярагъ Мегьамедаз бахшнавай форум кьиле тухунин месэлаяр веревирдна.
Къейд ийин хьи, гуьруьшда Мегьарамдхуьруьн райондин администрациядин кьилин сад лагьай заместитель Гьабибулагь Мурадалиева ва жемиятдин хатасузвилин месэлайрай райондин кьилин заместитель Зайнудин Азимовани иштиракна.
Малум хьайивал, Ярагъ Мегьамедаз бахшнавай форум алай йисан 30-июндиз кьиле тухуда. Мярекатдиз республикадин жуьреба-жуьре ведомствойринни карханайрин, жемиятдин, диндин, илимдин векилриз теклифда. Форумдин сергьятра аваз Дагъустандин руьгьдин культура ва илим вилик тухуник лайихлу пай кутазвайбурун алахъунар къейд ийида.
Чи мухбир
