И йикъара Ахцегь райондин Кьурукаларин хуьре машгьур алим, шейх Мегьамед Ярагъви рикIел хкуниз талукьарнавай спортдин акъажунар кьиле фена. Идакай «Лезги газетдиз» Ахцегь райондин Инстаграмда авай официальный чини хабар гузва.

Акъажунар хуьруьн имам Керим Жумаевич кьиле аваз жемятди РД-дин Муфтиятдин марифатдин отделдихъ ва райадминистрациядихъ галаз санал тешкилна.

Къейдна кIанда хьи, ихьтин мярекатри акьалтзавай несилриз ватанпересвилин тербия гунин карда важиблу роль къугъвазва.

Чешмеди кхьизвайвал, спортдин милли жуьрейрин акъажунрилай кьулухъ, гьа йикъан нянихъ, диндин межлисни кьиле фена. Ана Дербент шегьердин имамрин советдин председатель А.Аливердиева, Ахцегь райондин жемиятдин палатадин председатель А.Исмаилова, Кьиблепатан Дагъустандин хуьрерин, районрин имамри, жемиятдин деятелри иштиракна.

Мярекатар имамдин заместитель ва Ахцегь районди марифатдин отделдин руководитель Х.Ашуралиева кьиле тухвана.

«Лезги газет»