Ирс квадарзавач
КцIарин радиодин передачаяр лезги хизанри вилив хуьдай. Абура чи фольклор, меденият, чIал, адетар, шиирар, манияр… вири авай. Радиодин редакторвиле Ядуллагь Шейдаева кIвалахзавай.
Ядуллагь Шейдаев Жамалдинан хва 1929-йисуз КцIар райондин Аваран хуьре дидедиз хьана, 1982-йисуз, машинрин авариядик акатна, рагьметдиз фена.
Июлдин вацра «Алам» ТВ-ди, лезги эдебиятдин «Марвар» кIватIалди КцIарин ктабрин кIвале лезги эдебият вилик финик чIехи пай кутур писатель, муаллим Ядуллагь Шейдаеван 95 йисаз талукьарнавай мярекат кьиле тухвана. Вичин са акьван яргъалди тушир уьмуьрда адакай муаллим, «РикIин гаф» кIватIалдин кьиле хьайибурукай сад, медениятдин кIвалин чIехиди, чкадин радиодин редакциядин редактор хьана. Вичел чан аламаз писателдин 4 ктаб чапдай акъатна. Ам са романдин, са кьадар повестрин, гьикаяйрин, шииррин, сад-зур манийрин автор тир. Мукьвара адан «Туькьуьл, верцIи йисар» тIвар алай ктаб чапдай акъатна.
95 йисан юбилейдиз талукьарнавай мярекатда цIийи ктабдин презентацияни тешкилнавай. Аниз Ядуллагь муаллимдин чирхчирар, веледар, мукьва-кьилияр, санлай къачурла, 50-лай виниз инсанар атанвай.
Мярекатдал машгьур журналист Видади Севзиханов, чкадин радиода кIвалахай журналист, шаир Нева Абдурагьманова, Бегьрам Залов, Вакъиф Муьшкуьрви, Вакъиф Гьасратов, муаллим Гьажибала Ашуров, Римма Гьажимурадова, Абир ЭчIехви, Теране Керимова, Расим Бакаров, Зиятхан Мурадханов, Дилшад Алибегова, Оруж Оружев, Къурбаналийрин Камран, и цIарарин автор, писателдин веледар тир Бетура, Элхан, Тарлан Шейдаевар ва масабур Ядуллагь Шейдаеван уьмуьрдикай, эсеррикай рахана. ГьакIни чIехи хва Тарлана хтулрихъ галаз бубадин гафариз кхьенвай манияр тамамарна…
Мярекатдин иштиракчийри, лезги эдебиятдиз талукь месэлаяр веревирд ийидайла, Забит Ризванова, Лезги Нямета, Асеф Мегьмана, Байрам Салимова, Келентер Келентерлиди, Теймур Алиханова ва масабуру хайи чIал хуьн патал авур кьван крар гьуьрметдивди рикIел хкана. Юбилейдин межлисдин тешкилатчийри писателди тунвай яратмишунрин девлетлу ирс хуьн ва несилрал агакьарун умуми везифа тирди къейдна. Абуру гьакIни къведай йисуз Ядуллагь Шейдаеван тIварцIихъ галай гьикаятдин премия арадал гъунин ва райондин кьилевайбуруз КцIарин са куьчедиз адан тIвар гун патал чар кхьинин гьакъиндай меслятар авуна.
Гуьлалийрин Эйваз,
КцIар райондин Чпир хуьр
