5-декабрдиз Дагъустандин Кьил Владимир Васильев Дагъустан Республикадин патай РФ-дин Федеральный Собранидин Федерациядин Советдин член Сулейман Керимовахъ галаз гуьруьшмиш хьана. Гуьруьшдин сергьятра аваз Россиядин лап къадимлу шегьер тир Дербент вилик тухунин планар веревирдна.

Кьилди къачуртIа, шегьер аваданламишунин вад йисан программа туькIуьруникай рахана. Сифте нубатда  мастер-пландин лап хъсан концепция патал международный конкурс кьиле тухудайвал я. А планда шегьер неинки ана яшамиш жезвай агьалияр патал къулай шартIар яратмишунин барадай, гьакIни ада вичиз ийизвай харжияр вичи арадал хкунин барадай вилик тухун лазим тирди къалурнава. Проектдин макьсад Дербент яшайишдин алай аямдин шартIар, вичивай-вич хуьз жедай мумкинвал гузвай экономика авай тарихдин памятникдиз элкъуьруникай ибарат я.

Гуьруьш кьиле фидайла, Дербент шегьердин къеняй фин тийидай рехъ тухунин мумкинвилерни веревирдна.

Гайи вири теклифрин тереф Владимир Васильева хвена.

Гуьруьшда РД-дин Гьукуматдин Председателдин Сад лагьай заместитель Гьажимегьамед Гьуьсейнова, Дербент шегьердин кьил Хизри Абакарова иштиракна.

«Лезги газет»