ЦIийи йисан вилик Сергей Меликова Дагъустандин Кьилин грантар къачун патал малумарай конкурсдин гъалибчийрив дипломар вахкана.
2023-йисан конкурсдин нетижада яшайишдин жуьреба-жуьре хилериз (экономика, меденият, спорт, искусство ва масабур) талукь 246 проектдикай виридалайни хъсан 67 хкяна ва абур кьилиз акъудун патал, санлай къачурла 26,5 миллион манатдин кьадарда аваз пулдин такьатар чара ийида.
«ЦIи чна республика патал хийир авайбур хкягъун патал гьар са проект кьетIендиз ахтармишна. Жуьреба-жуьре пешейрай кIвалахиз, вилик гьар жуьредин макьсадар эцигиз, чна къазанмишзавай нетижайри чи виридан умуми агалкьун арадал гъизва. Илимдин, образованидин, медениятдин, экономикадин ва яшайишдин маса хилера зегьмет чIугвазвай бажарагълу ксар гьикьван пара хьайитIа, гьакьван чи жемият къуватлу ва сад жеда», — къейдна Сергей Меликова, гъалибчийрив дипломар вахкудайла.
Вичин рахунра республикадин Кьили конкурсда гъалиб хьайи са шумуд проектдикай ихтилатна. Мисал яз, Саид Мегьамедован, Султан Азизован, Гьажи Ибрагьимован ва Севрина Шамхаловадин проект алай вахтунда Украинада кьиле физвай махсус серенжемда кьегьалвилер къалурзавай дагъустанвийрихъ галаз алакъалу я. Асият Мегьамедовадини Абдулгьалим Исаева гъиле кьунвай кIвалах хъвадай цин еридиз талукь я. Сабрина Алиевадини Руслан Къурбанмегьамедова набут инсанриз зегьмет чIугвадай шартIар арадал гъунин месэлайрай махсус проект кьилиз акъудзава…
«Дагъустандин Кьилин грант чIехи гьуьрмет ва жавабдарвал я. Виридалайни кьилинди лагьайтIа, ада жуьреба-жуьре алакьунар авайбуруз чпин бажарагъдин гьунарар винел акъуддай мумкинвал гузва…», — лагьана С.Меликова.
Чи мухбир
