И йикъара Дагъустан Республикадин Гьукуматдин Председателдин заместитель Рамазан Жафарова республикадин Ситуационный центрадин дарамат эцигзавай гьал чкадал фена, ахтармишна. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Дагъустан Республикада авай Россиядин МЧС-дин Кьилин Управленидин начальник — Дагъустандин МЧС-дин министр Нариман Къазимегьамедова вице-премьер дараматдин архитектурадихъ галаз танишарна.
“3500 квадратный метрдин майдан авай дараматда РД-да авай МВД-дин ГИБДД-дин административный къайдаяр чIурун тайинардай автоматламишнавай центр, сад тир нумрадай — 112” оперативный къуллугъриз тади гьалда эвер гудай къуллугъ, четин гьалара идара ийидай центр, “Хатасуз шегьер” АПК-дин автоматламишнавай функцийрин блокрин комплексрин такьатар идара ийидай органар эцигда, — малумарна ада.
КьетIен гьаларин ведомстводин кьили суьгьбет авурвал, Ситуационный центрада гьисабунрин ва программайрин ресурсар, логический са майдандал уртах системаяр идара авунин процессар кIватIна сад ийида. И карди идара ийидай органриз регионда авай оперативный гьаларин гьа-къиндай тайин малумат агакьардай мумкинвал, уртах ведомствойрин кIвалах вири дережайра тайинардай ва кьетIен гьалар арадал атай дуьшуьшра къуллугъриз ва ведомствойриз тади гьалда малуматар агакьардай мумкинвал гуда.
Вичин нубатдай яз Рамазан Жафарова дарамат эцигунин кIвалахар кьиле физвай гьалдиз виниз тир къимет гана ва кIвалахар куьтягьдай вахтарин гьакъиндай рикIел хкана. РД-да авай Россиядин МЧС-дин ГУ-дин делилралди, дарамат 2019-йисан мартдиз эцигна куьтягьда.
«Лезги газет»
