Эхиримжи йикъара Дагъустандин жуьреба-жуьре муниципалитетра газдин пичер хъиткьинай, газдилай инсанар зегьерламиш, телеф хьайи дуьшуьшар арадал атана. Мисал яз, 18-январдиз Махачкъалада са кIвале газдилай хъиткьинун арадал атунин нетижада тамам хизан – дидени буба ва пуд аял телеф хьана.
Ихьтин дуьшуьшар хьунин себебрикай сад агьалийри чпин кIвалериз газ, пешекарар желб тавуна, какахьай жуьреда тухун я. Алатай гьафтеда республикадин Кьил Сергей Меликова талукь идарайриз, хатасузвилин къайдайрал амал тавуна, газ тухванвай кIвалер, майишатар винел акъудунин буйругъ гана.
23-январдиз Махачкъалада кьиле фейи совещанидал РД-дин Гьукуматдин Председатель Абдулмуслим Абдулмуслимова хабар гайивал, республикада и жигьетдай кIвалахдив эгечIнава. Ахтармишунар Госжилинспекциядин, газдин къуллугъдин, РД-дин энергетикадин ва тарифрин министерстводин векилри кьиле тухузва. Ахтармишунин серенжемар сифте нубатда Махачкъаладани Буйнакскда тешкилна.
«Лезги газет»
