Эхиримжи йисара Сулейман-Стальский районда спортдин путар хкажунин хел виликди физва. Райондин спортсменри мукьвал-мукьвал республикадин, уьлкведин ва международный акъажунра иштиракзава ва тарифиз жедай нетижаярни къазанмишзава.
Хъсан нетижаяр Россиядин чемпионатдин призёр, международный турнирдин гъалибчи, путар хкажунай спортдин мастер, азаддиз кьуршахар кьунай ва армреслингдай 1-разряддин, залан атлетикадай 2-разряддин спортсмен Магелан Саидован гъилик вердишвилер къачузвай жегьилри къалурзава.
Магелан Саидова 2015-йисалай Герейханован хуьруьн 2-нумрадин школада физкультурадин муаллимвиле кIвалахзава. И куьруь вахтунда ада гьазурай школадин хкягъай команда путар хкажунай республикада виридалайни зурбади хьана. Ада вердишарай спортсменри Сулейман-Стальский райондин хкягъай командадик кваз Дагъустандин кIвенкIвечивал патал акъажунра гъалибвал къазанмишна, гьа жигьетдай яз къизилдин — 2, гимишдин — 2 ва буьруьнждин 2 медални къачуна.
Гьар са аялдихъ галаз кьетIен жуьреда кIвалахзавай, абурун агалкьунрал лайихлудаказ дамахзавай М.Саидован теклифдалди мукьвал-мукьвал спортдин гьар жуьре серенжемар тешкилзава, “Дагъустандин путарин спорт, фитнес, атлетизм” тIвар алай хсуси сайт кардик кутунва.
Лезги Газет
