Мажара
И кар Хив райондин КьванцIилрин хуьре хьайиди я. Яшлу муаллим Къафланов Агъабег Къафлановича, хцин мехъерин тадарак яз, жунгав хуьзвай. Вични — як пара гудай жинсининди.
Нубатдин сеферда гьайвандин цIил (чка) дегишардайла, булахдал (чуьлда) ядни гана, цIилинин кьил кьуна, вилик кваз физвай ам жунгавди вичин саягъда “диндирмишна” крчарал кьуна, чилел гьалчна. Ахпа тIуш гуз эгечIна.
Гуьзлемиш тавур дуьшуьшдик акатай чIехи буба адаз куьмекчи яз фенвай хтулдиз — 9 йиса авай Девлетханаз акуна. Гежел вегьин тавуна, кIусни кичIе тахьана ам зурба гьайван бубадилай алудиз, лугьудайвал, халисан гьужумдиз фена: гъиле авай тIвалуналди вичивай жедайвал жунгавдин тIиш-пIуз ягъиз, гьараярна. И карди гьайван секинарна, чилел алкIурнавай инсандилай элячIна, ам катна.
Хуьруьн къерехда кIвалин цлал кIвалахзавай итимриз аялдин ван хьана, гьасятда абурни атана агакьна. Саки эхиримжи нефесдал атанвай яшлу итим абуру Кьасумхуьрел — райбольницадиз агакьарна.
Ана травматологиядин отделенидин саки вири къуллугъчияр, кьиле устад духтур Демир Ягъибегович аваз, жунгавдин хурукай хкудайди кьабулиз гьазур хьанвай. ГьикI хьи, КьванцIила амаз, Агъабеган стха Гьажисаида абуруз зенгнавай, хьанвай кардикай хабар ганвай.
Вахтунда агакьай куьмекри ва чкадал кьабулай тади серенжемри жунгавди ягъуникди 5 пакун тIвал, чилел алукьайла, къуьнуьн кIарабар ханвай, хуруз, рикIиз, жигерриз тади ганвай итим сагъар хъувуна.
Ажалдин къармахрай и тегьерда ахкъатай яшлу муаллимди гила сифте вичин гъвечIи хтулдиз — гьакъикъи кьегьалдиз, машин кьуна, тадиз больницадиз агакьарай хуьруьнвийриз, духтур-травматолог Демир Ягъибеговичаз, вири медработникриз сагърай лу-гьузва…
Саки пуд вацра месе гьатна, кIвачел ахкьалтайла, касди вичин хциз мехъерни авуна, гьа жунгав мехъерал тукIуна. Гьайванди 300 килограммдив агакьна як гана. Мехъер гурлудаказ, вири хуьруьн эл, мугьманар галаз кьиле фена.
ЧIехи буба кьиникьикай хкудай кьегьал Девлетхан, РФ-дин Федеральный Собранидин Советди 2019-йисан 23-июлдиз кьабулнавай “Аялар -Игитар” проектдал (№ 2.5.-17/310) асаслу яз, вич еке хаталувилик кутуна, масадан уьмуьр хуьз алакьунай махсус награда гун патал къалурнава.
Эхь, кьегьалвал садрани квахьдач. Аялдинни, чIехиданни.
Духтур-травматолог Сийидмегьамедов Даир Ягъибеговичан устадвал, пешекарвал, гьар юкъуз 3 сеферда къвез, начагъдал кьил чIугваз, къалурай къайгъударвални рикIелай алат тийирди я. Адакай и хизандин дуст, аялриз чIехи бубадин стха хьанва!
Вири и крарикай чазни Агъабег Къафланович мугьманвиле авайла чир хьана. Чнани ахьтин муаллимдиз, чIехи хизандин (13 аял хвена, чIехи авуна) кьилиз, КьванцIилрин вафалу хциз, чи газетдин амадагдиз куьмек гайи вирибуруз сагърай, баркалла, аферин лугьузва.
Макъала гьазурайди М.Жалилов я.
