Ихьтин лишандик кваз мукьвара Махачкъалада, “Россия — зи тарих” тарихдин паркунин залда, Ленинграддилай гьалкъа алудна 75 йис тамам хьуниз талукьарна, республикадин дистанционный къайдада инвалид аялриз чирвилер гудай центрадин (РЦДОДИ) аялрин иштираквал аваз мярекат кьиле тухвана. Аниз Ленинграддин блокадада хьайи Марина Бессаловадиз, “Аскеррин дидейрин Комитет» общественный организациядин председатель Зульфия Мегьамедовадиз, гьакIни Махачкъаладин Татам Мурадован тIварунихъ галай искусствойрин 5-нумрадин школадин директор Асия Гьажиевадин регьбервилик кваз тербия къачузвай аялриз ва муаллимриз, Каспийскдин М.Гьажиеван тIварунихъ галай гьуьлуьн военный школадин ученикриз-кадетриз ва масабуруз эвер ганвай.
Мярекатдин тешкилатчи РЦДОДИ-да яргъал йисара тарихдин тарсарин муаллим яз намуслудаказ зегьмет чIугвазвай чи ватандаш, вичин ери-бине Сулейман-Стальский райондин Испикрин хуьряй тир Нуризат Эрзихановна Абдулкъадирова тир.
КьетIенвал мадни а кардикай ибарат тир хьи, мярекат кьиле тухузвай Нуризат Абдулкъадировади ва РЦДОДИ-дин выпускник Рамазан Шамхалова Россиядин Кеферпатан меркездин блокададиз, Ватандин ЧIехи дяведиз талукь вакъиайрикай лугьунилай, аялри шиирар кIелунилай гъейри, кIватI хьанвайбуруз “Россия — зи тарих” тарихдин паркунин мумкинвилерикай менфят къачуналди, зурба экрандилай саки 900 юкъузни йифиз давам хьайи а мусибатдин вакъиаяр къалурна. Аялар видеойриз еке итиждивди тамашна. 1943-йисан 7-февралдиз Ленинграддин Финляндский вокзалдик ЧIехи чилелай недай суьрсет аваз сад лагьай поезд атайла, залда авай аялрин шадвилихъ кьадар авачир…
Эхирдай аялри “Крейсер Аврора”, “Къуй гьамиша рагъ хьурай!” ва маса манияр тамамарна. “Россия — зи тарих” тарихдин паркунин генеральный директор Азнаур Аджиеваз ва амай къуллугъчийриз мярекат кьиле тухуз куьмек гунай чухсагъул лагьана.
Мярекатдилай гуьгъуьниз Нуризат Абдулкъадировадихъ галаз кьиле фейи куьруь суьгьбетдай малум хьайивал, дистанционный къайдада (компьютеррикай менфят къачуналди) чирвилер къачузвай аялар патал и жуьредин гьар са мярекатдихъ кьетIен метлеб ава. Сагъсуз ва я бедендин мумкинвилер сергьятламиш хьанвай аялрин гуьгьуьлар ачух хьунихъни, абуруз чпиз-чеб, гьатта республикадилай къецепатарайни инсанар тамашиз къвезвай тарихдин еке парк мукьувай акунихъни еке важиблувал ава. Аялар мярекатдив рикI гваз эгечIуни, хъсан гьазурвал акуни и кардин шагьидвалзава, — къейдна Нуризат Эрзихановнади.
Рагнеда Рамалданова
