17-декабрдиз СтIал Сулейманан районда ветеранрин командайрин арада волейболдай республикадин дережада аваз акъажунар кьиле фена. Ам муниципалитетдин администрациядин спортдин, туризмдин ва жегьилрин крарин рекьяй комитетди 1-нумрадин ДЮСШ-дин куьмекдалди тешкилнавай.
Турнирдин иштиракчийрин вилик СтIал Сулейманан райондин кьил Саид Темирханов рахана. Ада муниципалитетда, спортдин маса жуьреяр хьиз, волейболни вилик тухуниз кьетIен фикир гузвайди къейдна ва акъажунра викIегьбур гъалиб хьун алхишна.
Къурбанали Магьмудован экуь къаматдиз бахшнавай турнирда 5 командади иштиракна. Нетижада 1-чка Дербент шегьердин волейболистри кьуна. 2-чкадиз — Каспийскдин, 3-чкадизни Избербашдин командаяр лайихлу хьана. 4-чка СтIал Сулейманан райондин кьисметдиз акъатна.
Гъалибчийриз кубокар, медалар, дипломар ва пулдин пишкешар гана.
«Лезги газет»
