Дагъустан Республикадин Халкьдин Собранидин депутатри Владимир Васильев региондин Кьилин къуллугъдал хкягъайдалай гуьгъуьниз республикадин гьукумат отставкадиз фенва. Амма Гьукуматдин цIийи состав арадал гъидалди ада вичин везифаяр тамамарун давамарда.
“Дагъустандин гьукуматди вичин векилвилер хивяй акъудунихъ галаз алакъалу яз, за къарар акъудзава: ЦIийи гьукумат тешкилдалди Дагъустандин гьукуматди вичин везифаяр кьилиз акъудун давамарин”, — лугьузва Дагъустандин Кьилин Указда.
В.Васильева малумарайвал, республикадин цIийи гьукумат пуд гьафтедин муддатда тешкилда.
“И мукьвара чна “Зи Дагъустан” лишандик кваз кьиле фейи кадрийрин конкурсдин финалистрив 13 удостоверение вахкана. Дагъустандин къенепата чIехи ва тешкил хьайи чи кадрийрин корпусдихъ галаз чна кIвалах фадлай тухузва”, — къейдна В.Васильева. Дагъустандин гьукумат гьикьван дережада цIийи хъийидатIа, гьа кар “тайин тир кIвалахди къалурда”, — алава хъувуна региондин Кьили.
В.Васильеваз ЦIийи гьукумат, республикадин кадрийрин конкурсда гъалиб хьайибурни желб авуналди, тешкилиз кIанзава. Ада министррин цIийи кабинетдин везифа агьалийрин тIал алай месэлаяр гьялун патал вири къуватар желб авуналди гьялуникай ибарат тирди малумарна. “КIвалахин, кIвалахин ва мад сеферда кIвалахин”, — лагьана Дагъустандин Кьили.
В.Васильева къейд авурвал, “Экономикадин рекьяй гьялун регьятдиз акъваз тийизвай тайин тир месэлаяр авайди” ада ва адан командади аннамишзава. “Инсанри чахъ авай делилар — ваъ, чпин уьмуьр хъсан хьанвайди мукьвал вахтара гьиссдайвал, месэлаяр гьялунив эгечIунин рекьер жагъурун герек я. Им виридалайни четин кар я”, — къейдна ада.
«Лезги газет»
