22-октябрдиз Махачкъалада къецепатан уьлквейра авай чи ватандашар патал кардик кутунвай медениятдинни образованидин «Зи Дагъустан» проектдиз талукьарнавай мярекат кьиле фена. РД-дин Гьукуматдин пресс-къуллугъди хабар гузвайвал, ана дуьньядин 18 уьлкведай атанвай 50-далай виниз дагъустанвийри иштиракна. Абурун арада Туьркия, ОАЭ, Иран, Ирак, Къиргъизия, Узбекистан, Къазахстан, Азербайжан ва маса уьлквеяр авай.
Мугьманар патал тарихдин «Россия - моя история» паркунин фойеда СтIал Сулейманан 155 йисан юбилейдиз талукьарнавай, Дагъустанда международный бандитрин кIеретIар терг авурдалай инихъ 25 йис алатуниз бахшнавай, Дагъларин уьлкведин халкьдин сеняткарвилеринни «Дагъустан» чапханада акъатнавай ктабрин выставкаяр гьазурнавай.
Къецепатан уьлквейрай мугьман хьанвай ватандашар РД-дин Гьукуматдин Председатель Абдулмуслим Абдулмуслимова тебрикна. Вичин рахунра ада кьисметди маса уьлквейриз акъуднавай дагъустанвийри чеб авай чкайра дагъвийрин адетар, медениятдин ирс, руьгьдин ивирар хуьзвайди ва абуруз вири рекьерай куьмекар гун республикадин гьукумдин вилик акъвазнавай месэлайрикай сад тирди къейдна.
Мярекатдал малум хьайивал, Дагъустандин гьукумдин органри дуьньядин 40-далай виниз уьлквейра яшамиш жезвай дагъустанвийрихъ галаз алакъаяр хуьзва. Виридалайни гзаф чи ватанэгьлияр Туьркияда ава (500 агъзурдалай виниз).
А. Абдулмуслимова хабар гайивал, Дагъустанда жуьреба-жуьре уьлквейра авай чи ватандашриз куьмекар гудай махсус комиссия арадал гъанва ва ада алай йисан августдин вацралай кIвалахзава. Комиссиядин кьилин макьсадрикай сад чи ватандашриз чеб авай чкайра вири рекьерай куьмекар гун ва абуру Дагъустандихъ галаз хуьзвай алакъаяр мадни мягькемарун я.
Мярекатдикай гегьеншдиз РД-дин Гьукуматдин сайтдай кIелиз жеда.
Агьмед Магьмудов
