Ахцегь райондин Культурадин кIвале Ватан хуьзвайбурун йикъаз талукьарнавай шадвилин мярекат кьиле фена. Столрихъ зегьметдин ва Афгъанистандин, Чечнядин, гьакI маса вакъиайрин ветеранар, къайдаяр хуьдай органрин, райадминистрациядин, военкомиссариатдин векилар ва теклифнавай маса ксар галай. Абур тебрикуналди, мярекат райондин культурадин хилен начальникдин заместитель Абдулкерим Рагьимова ачухна ва “Ахцегь район” муниципалитетдин кьил Осман Абдулкеримоваз сифте гаф гана.
— Гьуьрметлу ветеранар, районэгьлияр! Гьакъикъатдани, 23-февраль итимрин сувар я. Хайи Ватан вири уьлкведиз машгьурнавай кьегьал рухваярни рушар — дявединни зегьметдин игитар, зурба алимар, пагьливанар акъатнавай чка я чи район. Райондин руководстводин ва райсобранидин патай чна квез сувар рикIин сидкьидай тебрикзава! Чандин мягькем сагъвал, яргъи уьмуьр, кьилел ислягь цав хьурай! Дуьнья ислягь, уьлкве мублагь, хайи район виликди фирай, гьар са рекьяй агалкьунар хьурай! — лагьана Осман Магьмудовича.
Военкомиссар, подполковник Рафик Мегьамедова женгеринни гъалибвилерин тарихдикай суьгьбетна, абурук чи ватанэгьлийри кутунвай пайни гъвечIиди туширди къейдна.
— 100 йис идалай вилик, 1918-йисан 15-январдиз, жегьил уьлкведин Совнаркомдин махсус Декрет кьабулуналди арадал атай Яру Армияди граждан ва гуьгъуьнлай Ватандин чIехи дявейра гьунарлувал къалурна. Чна Советрин Союздин Игитар тир Валентин Эмировал, Гьазрет Алиевал, комдив Хайирбег Замановал, генералар тир Магьмуд Абиловал, Якъуб Къулиевал, Фарид Балалиевал, къе чахъ галаз залда авай Шагьбан Менафован хва — генерал Игит Шагьбановал ва пара масабурал дамахзава. Къе чи виридан, иллаки Афгъанистандин, Чечнядин, Венгриядин ва маса вакъиайрин иштиракчияр тир ветеранрин кьилин везифа жегьил несил бубайрин баркаллу краралди лайихлудаказ тербияламишун я, — лагьана Рафик Гьажиагъаевича.
Мярекатдал гьакI райсобранидин председатель Абдулкерим Палчаев, райондин ветеранрин советдин председатель Хайируллагь Велиев, райадминистрациядин кьилин заместитель Алмас Шуаев, райондин культурадин управленидин начальник Ширинбег Мусаев, Афгъанистандин дяведин ветеранрин советдин председатель Нажмудин Гудаев, райондин дишегьлийрин советдин председатель Ханум Фетуллаева, СССР-дин МВД-дин ветеран Шагьбан Менафов ва масабур рахана.
Маналу рахунрин арада суварин мярекатдин иштиракчийрин гуьгьуьлар хкажун патал РД-дин лайихлу артистар тир Рубаба Къурбановади, Цуьквер Мамедовади, РД-дин культурадин лайихлу работникар Саид Эскерханова, Межид Межидова, Культурадин кIвалин гьевескар артистар тир Фикрет Баширова, Таира Муспагьовади, Зульфия Гъаниевади, Сафидин Эскерханова, Исмаил Ризаханова, Фатима Рагьимовади, ашукьрин “Шарвили” ансамблди ва райондин халкьдин театрдин артистри (абуру “Бахтлу буба” сегьне къалурна) ватанпересвилин манияр лагьана.
Дашдемир Шерифалиев
