2018-йисан ноябрдин вацра Кьасумхуьруьн культурадин дарматда Етим Эминан 180 йисан юбилейдин мярекат кьиле фенай. Анал рахай Амаханов Эмирбега вичи ЦицIерин хуьруьз эквер гъизвайдакай ва Етим Эминан юбилейдин гьуьрметдай ЦицIерин хуьряй Ялцугърални эквер гъида лагьанай.
Исятда ЦицIерин хуьруьз кьван экверин линия хканва. Анай Ялцугърал кьван авайди 1 километр рехъ я. Гьелбетда, им регьят кар, мехъерик ийизвай кьуьл туш, кьве чарх яна, хкечIдайвал. Эквер гъун патал шалманар, симер, трансформатор ва техника герек къвезва. И крар вири пулунин такьатрихъ галаз алакъалу я. А касди, ачух рикI авай мерд хва тирвиляй, и крар вичин хивез къачуна. Амма адаз и пар залан жезва. Етим Эмин са Эмирбегаз талукь кас яни? Лезги халкьдихъ Эмирбег хьтин рикI ачух, мерд рухваяр мад авачни?
Гьелбетда, авазва. Гьа гьисабдай яз — чи Сулейман-Стальский райондани. Анжах а ксарал и гьарайдин ван агакьун жаваб жагъун тавунвай месэла яз ама.
Райондин вилик-кьилик квайбуру, и месэладиз фикир гана, Эмирбегаз куьмекдин гъил яргъи авуна, гъилевай йисуз кьванни Ялцугърал эквер жедайвал авунайтIа, ажеб жедай.
РикIел хкин, 1970-80-йисара КIварчагърин “Коммуна” ва “Аламишинский” совхозри Ялцугърал эквер хкидай планар янай. Амма а планар, руьхъведин кIунтIар хьиз, чкIанай. Тажуб жедай кар я: Ялцугъар элкъвена кьунвай вири хуьрера эквер ава, анжах са и хуьр, эквер авачиз, амукьнава.
Мад са алава. Ялцугърал Етим Эминан кIвал алай чкадал адаз са куьлуь кIвал-музей хъувунайтIа ва ам фаракъатнавай сурар, михьиз амукьдайвал, кIевирнайтIа, Етим Эминаз гафаралди ваъ, краралди гьуьрмет авун жедай.
Жуван ихтилат заз Етим Эминан цIараралди акьалтIариз кIанзава:
И дуьнья са фана багъ я,
Куьне квез гьуьрмет ая тIун.
Гваз фидайди вад юкI агъ я,
ШейтIандиз лянет ая тIун.
Мирзехан Рамазанов
