И мукьвара Москвада каратэ кёкушинкайдай Россиядин чемпионат акьалтIна. Ана Москвадин патай экъечIнавай чи ватандаш Шамил Рамазанова (шикилда — чапла патахъай) 80 кг-дал къведалди заланвал авайбурун арада буьруьнждин медаль къазанмишна. Чаз умудлувал гузвай, чи руьгь хкажзавай адан агалкьунрикай чна виликрайни са шумудра хабар гайиди я.
РикIел хкин: Ш.Рамазанова Россиядин физический культурадинни спортдин госуниверситетдин рагъэкъечIдай патан единоборствойрай бягьсер чIугвадай факультет акьалтIарна. Ана кIелдайла, Шамила вичин заланвиляй Москвадин областдин кIвенкIвечивал патал акъажунра ва Россиядин чемпионатда иштиракнай, гьасиррал экъечIай гьар сеферда гъалибвал къазанмишнай. Тренерар тир Эмил Жафарован ва Арсен Рамазанован гъилик вердишвилер къачуналди, ада вичин устадвал хкажна.
Къенин юкъуз Ш.Рамазанов вичик еке умудар кутазвай спортсменрикай сад яз гьисабзава. Ам са шумуд сеферда Европадин чемпионвилин тIварцIиз лайихлу хьанва. ИкI, 2015-йисан майдиз Москвада кёкушинкай каратэдай кьиле фейи Европадин чемпионатда ада 1-чка кьуна. Берлинда спортдин и жуьредай кьиле фейи чемпионатдани Россиядин хкянавай командадик кваз иштиракай чи ватандашди чемпионвилин тIвар къазанмишнай (амма тренировкада кьуьнтез тIарвал хьанваз, адавай дуьньядин чемпионатда иштиракиз хьаначир).
Кесерлу гзаф турнирра ва акъажунра къазанмишай гъалибвилериз килигна, 2016-йисуз Британиядин машгьур порталдин (kyokusinresults.com.) версиядалди, дуьньядин виридалайни хъсан 10 каратистдин (80 кг-дал къведалди заланвал авайбурун арада) жергедик Шамил Рамазановни акатзавай.
Шамил Рамазанован ери-бине Кьурагь райондин Хпежрин хуьряй я. Алай вахтунда ам Москвада яшамиш жезва, рагъэкъечIдай патан единоборствойрай ада тренер язни зегьмет чIугвазва. Къуй чи ватандашдихъ дуьньядин чемпионвилин тIвар къазанмишдай къуватарни хушбахтлу уьмуьр хьурай!
Рагнеда Рамалданова
