Къанундал къул чIугуна

РФ-дин Президент В.Путина тамам тушир мобилизациядин сергьятра аваз эвер ганвайбурун карчивилин кIвалахар ихтибарлу ксарив вугудай ихтияррин гьакъиндай къанундал къул чIугуна. Идакай “Новости” РИА-ди хабар гузва.

“Сад тир Россия” партиядин генсоветдин секретарь А.Турчака къейд авурвал, кардик квай къанунди военный къуллугъдал алайбуруз карчивилел машгъул хьун ва я тешкилат аваз хьун къадагъа ийизва. Гьавиляй мобилизациядик акатайбур тади гьалара бизнес агалуниз мажбур жезвай. ЦIийи къанунди ла­гьайтIа, бизнесдин сагьибди СВО-да иштиракзавай муддатда адан крар вахтуналди ихтибарлу касдиз идара ийидай ихтияр гузва.

Махсус серенжемдикай

24-октябрдиз РФ-дин обо­ронадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 325 самолет ва 162 вертолет, зенитный ра­кетайрин 383 комплекс, пилот галачиз лув гудай 2326 аппарат, 6020 танк ва дяведин маса машинар, РСЗО-дин 874 машин, артиллериядин ва маса 3521 яракь, военный махсус 6741   автомашин тергна.

Венгрия экечIдач

Россиядиз акси яз газдин хиляй малумарзавай цIийи санкцийриз Венгрия акси я. Уьлкведин гьукумдарри хиве кьунвайвал, Евросоюзди цIийи санкцияр кардик кутур лугьуз къурхуяр гузватIани, Венгрияди чпин тешкилатрив агакьарзавай газ акъва­зардач.

Информациядин терроризм

Ирандин президент И. Раисиди къейднавайвал, санкцийрин нетижасузвал себеб яз США информациядин терроризмдив эгечIнава. Адан гафар “Новости” РИА-ди раижнава.

“США санкцийри кIвалахзавачирдан гъавурда акьунва. Гьавиляй маса рекьер жагъурзава. Информациядин терроризм — им кьилин бедбахтвал я”, — лагьана Раисиди.

Адан гафаралди, Вашингтонди Иранда чалпачух гьалар арадал гъана, амма къаст кьилиз акъатнач.

Умуд кутазва

Украинадин президент В.Зеленскийди Италиядай, Фран­циядай,  Германиядай ва маса уьлквейрай ПВО-дин системаяр ага­кьа­руник умуд кутазва. Идакай “Новости” РИА-ди хабар гана.

“Чаз ПВО герек я. Чун патал ихьтин системаяр исятда гзаф важиблу я. Женгер себеб яз Украинадай катнавайбур чаз эл­къвена хтана кIанзава. Чна чи экономика гуьнгуьна хтуна кIан­да…”, — лагьана ада.

В.Зеленскийди Италияди Франциядихъни Германиядихъ ­галаз санал ПВО-дин системаяр арадал гъизвайди рикIел ­хкана.

РФ-дин къецепатан крарин министр С.Лаврова идалай вилик къейд авурвал, НАТО-дин уьлквеяр цIув къугъвазва.

Немсерин “Welt” газет кIелзавайбуру Украинадин президент­дин меслятчи А.Роднянскийдин истемишунар критика авуна. Ма­лумарзавайвал, Украинадин гьукумдарри Германиядивай гьар вацра 500 миллион доллардин кьадарда пулунин такьатар гун тIалабнава. Гзафбуру Украинадин гьукумдарар адалатсузбур яз гьисабзава. Налогар гузвай немсери Киевдин истемишунар чпиз лапIаш вегьей мисалдив гекъигзава.

“500 миллион доллар? Белки, санлай чи уьлкве вахкун? Зун украинви сиясатчийрин гьаясузвили тажубарнава”, — кхьенва газетдин сайтда са немсди.

“Украинада авай къалмакъал анжах Зеленский президентдин къуллугъдилай элячIайдалай кьулухъ гьялиз жеда”, — кхьизва Германиядин маса агьалиди.

ЦIийи санкцияр

Иранди Россиядиз яракьар ракъурунин вилик пад кьунин макьсаддалди США-диз вичин амадагрихъ галаз санал акси санкцияр кьабулиз кIанзава. США-дин госдепартаментдин пресс-къуллугъдин малумат “ТАСС” чешмеди раижна.

Къейднавайвал, Вашингтонди хатасузвилин жигьетдай Украинадиз гузвай куьмекар мадни гегьеншарда, гьа жергедай яз   ПВО-дин хиляйни.

Алатай гьафтеда ООН-дин Хатасузвилин Советда кьиле фейи агалай заседанидал, гуя Россиядиз пилот галачир аппаратар гузва лугьуз, Ирандик тахсирар кутунай. Гуьгъуьнлай журналистрин вилик рахай ООН-да Россиядин гьамишан векилдин заместитель Д.Полянскийди ва ООН-да Ирандин гьамишан векил А.Ираваниди къейдна хьи, РагъакIидай патан уьлквейри малумарзавай тахсирар Москвадини Тегеранди гьич кьабул­завач.

«Лезги газет»