Серенжемрилай аслу я
Чи уьлкведа коронавирусдин тIугъвал куьтягь хьун вакцинациядин еришрилай ва къалп сертификатрихъ галаз женг тухунилай аслу я. Ихьтин фикир вице-премьер Татьяна Голиковади малумарна. Адан гафар “РБК” чешмеди раижнава.
Голиковадин гафаралди, къейднавай кьве месэладиз гьикьван хъсандиз фикир гайитIа, гьакьван фад Россиядай тIугъвални квахьда. Къейд авурвал, ял ядай гьафте малумарнатIани, ковид чукIунин жигьетдай 10 регионда гьалар мадни пис хьана: Саратовдин, Белгороддин, Тюмендин, Челябинскдин, Ярославлдин, Магадандин областра, Красноярский крайда, Татарстан, Тыва ва Чувашия республикайра.
“Вирус чукIунин “зунжур” кьатIун патал адаз акси рапар ягъунин гьерекатар артухарна кIанда”, — лагьана ада.
Вири регионрин гьукумдарри QR-кодрин система кардик кутун малумарнава. Декабрдин юкьвара хьиз виринра и серенжем къуватда гьатда. ВОЗ-дин Россияда авай векил М. Вуйновичан фикирдалди, ял ягъун патал малумарай йикъарин нетижалувал инсанрилай аслу я. Гзаф вахтара герек тир серенжемрал амалзавач, инсанри вирус чукIунин гьерекатриз рехъ гузва.
МИД-дин векилдин зарафат
Россиядин МИД-дин векил Мария Захаровади Украинадин терефди къемедачи Максим Галкин “чIулав сиягьдик” кутунин делилдикай зарафатдин гафар малумарна. Вичин фикир ада хсуси TeIegram-каналда кхьена.
“Украинадин милли хатасузвал хаталувилик ква — адаз Россиядин къемедачийри къурху гузва…”, — зарафатдивди кхьена М.Захаровади.
Малум тирвал, 4-ноябрдиз Украинади М.Галкин “хаталубурун” сиягьдик кутуна.
Салан майваяр неъ лугьузва
Пегьризчи Е.Арзамасцеван фикирдалди, зулун вахтунда стресс явашарун патал салан майваяр тIуьн герек я. Духтурди вичин теклифар “Москва 24” чешмедиз раижна.
Зулунни хъуьтIуьн муддатда чугъундуррини газарри неинки сагъламвилиз, гьакI стресс алудунизни хъсан патахъай таъсирда. Пешекарди къейдзавайвал, чугъундурдик нервийрин система къайдадик кутун патал герек тир витаминар ква. Адан гафаралди, бедендик бес кьадар хром тахьуникди инсандин гуьгьуьлар чIур хьун мумкин я. Нервияр чIур хьуникди инсанри зулун вахтунда ширинлухар тIуьниз гзаф майилвалда, пешекарди тестикьарзавайвал, гьа и себебди бедендиз хром бес тежезвайдан гьакъиндай шагьидвалзава. Вилерин экв зайифбуруз А витаминдалди девлетлу газарар тIуьнни теклифзава.
“РикIин сагъламвал патал важиблу тир калий квай келем ишлемишунихъни еке метлеб ава”, — лагьанва духтурди.
Идалай вилик Америкадин алимри яхун жез куьмекдай пуд суьрсет малумарнай: буран, ич ва келем.
Тахсир квачиз 23 йисуз дустагъда
США-да тажуб жедай агьвалат арадал атана: 51 йисан яшда авай Э.Болден 23 йисуз, са тахсирни квачиз, дустагъда ацукьна ва гила судди адаз эвездин пул хгунин къарар акъуднава. Чкадин чешмейрал асаслу яз, идакай “Лента.ру” сайтди хабар гана.
Къейдзавайвал, тахсирсуздаказ вичин багьа уьмуьрдин пай дустагъда акъудай америкавидикай гила миллионер хьанва. Суддин заседанида иштиракайбуру Болденаз 25 миллион доллар эвез яз хгун гьахълу къарар яз гьисабна. Болденак кьве кас кьена лугьуз тахсир кутунай.
Хъсан рекьер авай шегьерар
Грозный, Белгород, Саранск, Якутск, Магнитогорск, Владикавказ, Набережные Челны, Калуга, Махачкъала ва Нижневартовск улакьрин хъсан рекьер авай Россиядин шегьеррин сиягьдик акатнава. Идакай «Известия» чешмеди хабар гана.
ТIварар кьунвай шегьеррин агьалийрин чIехи паяр улакьрин рекьерин еридилай ва рекьерин къуллугъчийри тамамарзавай кIвалахрилай рази я.
“Ингосстрахди” 250 агъзурдалай виниз агьалияр яшамиш жезвай шегьерра сентябрдизни октябрдиз ахтармишунар кьиле тухвана. Иштиракчийри рекьерин гьалдиз, общественный улакьрин, рекьерин полициядин кIвалахдиз, гьакIни рекьерал “кIумпар” арадал атунин мумкинвилериз къимет гана. Къейдзавайвал, рекьерин еридилай агьалийрин анжах са паюни разивал ийизва.
Иштиракайбурун фикирдалди, виридалайни нагьакьан рекьер Смоленскда, Рязанда, Владивостокда, Томскда, Костромада, Брянскда, Архангельскда, Санкт-Петербургда, Петрозаводскда ва Ярославлда ава.
Кесиб жеда
“Обозреватель” чешмедин делилралди, Украинадин агьалияр кесибвилихъ фида: 2022-йисуз мажибдин агъа кIанин кьадар ва пенсияр авайдалай тIимил жеда.
Идалай вилик политолог А.Ермолаева малумарайвал, Украинадин экономика пайгардик квач ва ада уьлкведиз зиян жедай жуьреда кIвалахзава.
«Лезги газет»
