Рушак лишанар кутур пакад юкъуз Хадижат, рушав вугудай жегьизар вучар аватIа акваз, туьквендиз рекье гьатна.
— Я руш, я Хадижат, в-у-ув, руш низ гана? Е-кье-е, руш гьадан тай яни?
— Я Хадижат, цуьк хьтинди гьакI гадардани мегер?
— Я Хадижат, ваз ви руш амукьиз кичIезвайни?
— Я Хадижат, гьа миллетдиз (тухумдиз) на руш гьикI лагьанай гайиди я?
Туьквендиз фидай рекье Хадижатан япарихъ галукьайбур гьа ихьтин наразивилин гафар хьана. “Я Хадижат, на руш ганалди хьи. Динж хьурай, бахтлу хьурай” — садан сивяйни акъатнач.
Туьквендай хкведай рекье, са куьн патахъай ятIани санал кIватI хьанвай дишегьлийрин патав фена, Хадижата гьарайна хьиз лагьана:
— Я гуж тахьай вахар, гьалтай-гьалтайда рушан патахъай заз гьикьван туьнбуьгьар ийида? Зи руш кIанз, лацу балкIандал алаз пачагьдин гада атана, за тагайди авани мегер? Руш тухудайдаз гана кIандачни? КIандайди атайла, зани гана. Куьди вуч гьарай-эвер я?..
Фазила Абасова
