11-декабрдиз Хасавюрт райондин Къурушрин хуьруьн жуьмя-мискIинда диндин межлис кьиле фена. Ам Мугьаммад пайгъамбар (с.а.с.) дидедиз хьайи пак Рабиуль-Авваль вацран сергьятра аваз тешкилнавай.

Диндин мярекатда Хасавюрт райондин имамдин куьмекчи Мавлидин Мичивашаева, РД-дин Муфтиядин марифатдин отделдин къуллугъчийри, Сулейман-Стальский райондин имам Гьасан Амаханова ва диндин маса векилри иштиракна.

Мугьманар тебрикуналди, межлис Къурушрин хуьруьн имам Азим гьажи Панагьова ачухна. Ада пайгъамбар дидедиз хьайи варз вири мусурманриз рикIин сидкьидай тебрикна ва Къуръандин аятар кIелун патал гаф Абдуллагь Гьамидоваз гана.

Гуьгъуьнлай хуьруьн имамди Мугьаммад пайгъамбардин (с.а.с.) уьмуьрдикай, ам дидедиз хьунихъ галаз алакъалу аламатдин вакъиайрикай суьгьбетна.

Мавлидин Мичивашаева вичин рахунра хизанра тербиядин кIвалах Исламдин диндин бинедаллаз тешкилунихъ еке метлеб авайди къейдна.

Марифатдин отделдин векил К.Къурбаналиева Мугьаммад пайгъамбардихъ (с.а.с.) авай кIанивилин кьетIенвилерикай, важиблувиликай итижлу суьгьбетар авуна.

Къурушрин хуьре урус чIаланни литературадин муаллим яз кIвалахзавай шаир Майор Агъаева рагьметлу имам Мугьаммад Хидирован экуь къаматдиз бахшнавай шиир кIелна.

Мярекатдин сергьятра аваз рахай К.Шайихов Аллагьдин векилдин уьмуьрдай къачунвай жуьреба-жуьре вакъиайрикай, легьзейрикай рахана.

Межлисдин эхирдай «Ас-Салам» газетдин кьилин редактор Гьасан гьажи Амаханов рахана. Ада «Ислам диндал амал авуниз эвер гун» темадай ихтилатар авуна. ГьакIни Сулейман-Стальский райондин имамди мусурманриз лезги чIалал акъатзавай «Ас-Салам» газет подписка авуниз эвер гана.

Диндин межлис иштиракчийри санал дуьа авуналди куьтягь хьана.

«Лезги газет»