Сулейман-Стальский райондин администрацияда совещание кьиле фена. Адан кIвалахда экологиядин ва тIебиатдикай менфят къачунин Кьиблепатан районрин уртах управленидин руководитель Рамиз Велиева, “Экологи-Ка” ООО-дин руководитель Альберт Черникова, райондин депутатрин собранидин председатель Штибег Мегьамедханова, райадминистрациядин кьилин заместителри, хуьрерин администрацийрин кьилери иштиракна.
Совещанидал, яшайишдин кIеви амукьаяр (ТКО) кIватIунин цIийи къайдадал элячIунихъ галаз алакъалу яз, райондин мулкар санитариядин рекьяй михьи авунин месэладиз килигна.
Райадминистрациядин архитектурадин, эцигунрин ва ЖКХ-дин отделдин начальник Мустафа Мустафаева къейд авурвал, районда михьивилер авуниз еке фикир гузва, гатфарихъай ва зулухъай “михьивилерин варцар”, хуьрера аваданламишунин, зирзибилдикай михьи авунин кIвалахар тухузва. Дагъустан Республикадин Кьилин “Къацу километрияр” серенжемдин тереф хуьналди, 2018-йисуз районда 800-дав агакьна къелемар цана, и кар алай йисузни давамарзава.
ТКО кIватI хъувунин цIийи къайдадал элячIунихъ галаз алакъалу месэладикай рахадайла, М.Мустафаев яшайишдин кIеви амукьаяр кIватI хъувунин, тайинарнавай чкайрал тухунин, анрал зирзибил вахтуналди тунин, икьрарар кутIунунин, агьалийривай ТКО кIватI хъувунай пул къачунин ва кар алай маса месэлайрал акъвазна. ИкI, ада къейд авурвал, 2019-йисан 1-январдилай районда ТКО кIватI хъувунал “Экологи-Ка” ООО машгъул я. Карханадиз кIвалахдай вири жуьредин шартIар яратмишнава, Кьасумхуьрел офис патал дарамат (кIвал) чара авунва, вири база, гьабурукай яз алишверишдин ва маса объектрин реестр “Парус” программада тунва. Районда икьван чIавалди зирзибил кIватIунал машгъул тир “Касумкентсервис” ООО-дихъ махсус 5 техника, гьакIни арендадиз къачунвай 8 автомашин ава. Законрин цIийи истемишунралди ТКО кIватI хъувунай 5 агъзурдалай тIимил инсанар яшамиш жезвай хуьрерин гьар са агьалиди 37 манат, 5 агъзурдалай виниз агьалияр яшамиш жезвай хуьрерин гьар са агьалиди 50 манат пул гун лазим я.
“Касумкентсервис” ООО-дин директор Гъалиб Фатагьова лагьайвал, ООО-ди 32 хуьре яшамиш жезвай 42000 касдиз къуллугъзава, вири хуьрерин кьилерихъ галаз икьрарар кутIуннава, зирзибил кIватIзавай машинрин график ва маршрутар тайинарнава. Гьа са вахтунда гьял тавунвай месэлаярни тIимил амач. ИкI, региондин операторди йисан сифтедилай “Касумкентсервис” ООО-диз пулдин такьатар тамамвилелди чара авунвач, нетижада карханада кIвалахзавайбуруз вахт-вахтунда мажибар гуз жезвач. Гьялиз тахьанвай вири месэлайрикай райондин кьил хабардар я, талукь чарар РД-дин тIебиатдин ресурсрин ва экологиядин министерстводиз ва региондин оператордиз ракъурнава.
Альберт Черникова совещанидин иштиракчийрин фикир гьялзавай месэладин важиблувилел желбна.
— Чи хиве еке жавабдарвал гьатнава, — лагьана А. Черникова. — Чи везифа райондин агьалийриз къулай яшайиш тешкилуникай ибарат я. Хуьрерин администрацийрин кьилерин, жавабдар къуллугъэгьлийрин куьмек галачиз гъиле кьунвай кIвалах кьилиз акъудиз хьун мумкин туш. Пулдин такьатар тахьуни чи кIвалах четинарзава. ЯтIани чна агьалийриз къулай хьун патал зегьмет чIугвазва. ИкI, агьалийривай ТКО кIватIунай пул гунин карда почтарин отделенийрин, “Сбербанк Онлайндин” къул-лугърикай менфят къачуз жеда.
Гьялзавай месэладай совещанидал Сулейман-Стальский районда региондин оператордин векил Рамиз Бабаев, экологиядин ва тIебиатдикай менфят къачунин Кьиблепатан районрин уртах управленидин руководитель Рамиз Велиев ва маса ксар рахана.
Совещанидин нетижаяр райондин кьилин везифаяр тамамарзавай Лацис Оружева кьуна, кIвалах хъсанардай теклифар гана.
Гьа са вахтунда Лацис Оружева лагьайвал, региондин оператордин районда авай векилди, “Касумкентсервис” ООО-дин пешекарри, хуьрериз физ, яшайишдин кIеви амукьаяр кIватIунин цIийи къайдайрикай агьалийрин арада гъавурда тунин кIвалах тухун чарасуз я.
Чи мухбир
