Ахцегь райондин кьилин духтурханадиз Къемер Адигуьзеловадин-Палчаевадин тIвар гун теклифнава. “Лезги газетдиз” муниципалитетдин администрациядин пресс-къуллугъди хабар гайивал, и месэла чкадин депутатрин собранидин заседанидал райондин общественный палатадин кьил Али Исмаилова къарагъарна. Мярекатда иштиракай вири депутатри и теклиф кьабулна.
Мукьвара и месэладин патахъай республикадин здравоохраненидин министерстводиз махсус чар рекье твадайвал я.
Къейд ийин хьи, Къемер Адигуьзелова-Палчаева Дагъустанда илимрин доктор хьайи сад лагьай дишегьли я. Ватандин ЧIехи дяведин йисара ада Ахцегь райондин духтурханадиз регьбервал гана, гьа са вахтунда офтальмологдин, хирургдин, терапевтдин везифаяр тамамарна.
Яргъал йисара ада Бакуда вилерин азаррин илимдинни ахтармишунрин институтдин директордин заместитель яз зегьмет чIугуна, вишералди инсанрин вилериз экв хкана.
«Лезги газет»
