ТАСС-ди хабар гузвайвал, Урусатдин МЧС-дин къуллугъчийри Дагъустанда жуьреба-жуьре чкаяр дезинфекция авунин мярекатар давамарзава. Чешмедин делилралди, гьелелиг тахминан 1,5 миллион кв. метрдин майданар дезинфекция авунва.
РФ-дин МЧС-дин пресс-къуллугъдин делилралди, дезинфекция авунвай чкайрик шегьре рекьер ва инсанар къекъведай тротуарар, 24 паркни сквер, медицинадин — 62, образованидин — 77, административный — 93 идараяр, ракьун рекьерин 3 вокзал, са завод, са санаторий ва яшайишдин рекьяй къуллугъдай муьжуьд центр акатнава. Идалай гъейри, ругуд автостанциядал, инсанар акъваздай 140 пендал (остановка), улакьар акъвазардай 304 пендал, 33 базардал, 51 мискIинда, 6 килисада, 2 пляждал санитариядин рекьяй кIвалах кьиле тухванва.
Къейд ийин хьи, 18-майдиз Урусатдин Президент Владимр Путина РФ-дин МЧС-дал республикада дезинфекция авунин рекьяй чIехи мярекатар кьиле тухун тапшурмишна. Уьлкведин регьбердин тапшуругъ тамамарун патал Дагъустандиз Урусатдин МЧС-дин Ногинскдин, Донскдин ва Волжскдин къутармишдай центрайрин дестеяр атанва.
«Лезги газет»
