20-октябрдиз Дагъустан Республикадин Кьилин везифаяр вахтуналди тамамарзавай Сергей Меликова региондин мулкунал коронавирусдин цIийи инфекция гъунин ва чукIурунин вилик пад кьунин рекьяй Оперативный штабдин заседание видеоконференциядин алакъадин къайдада кьиле тухвана. Адахъ галаз муниципальный тешкилатрин кьилер ва талукь тир ведомствойрин руководителар алакъада гьатна. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Заседание ачухай С.Меликова къейд авурвал, азардихъ галаз женг чIугунин барадай кIватIнавай тежрибади агьалийриз медицинадин рекьяй виликандалай гзаф нетижалудаказ куьмек гудай ва вилик акъваззавай четинвилерай экъечIдай мумкинвал гузва.
“85 региондин жергеда республика, коронавирусдин азар акатунал гьалтайла, 23-чкадал ала. Ида Дагъустанда гьалар бегьем къизгъинбур ва муракаббур ятIани, гьукумдин органрин чалишмишвилерин нетижада гуьзчивилик квайдан патахъай лугьузва. Вири муниципалитетра сад хьтин гьалар авач: алатай гьафтедин эхирра аваз хьайи гьалариз талукь делилралди, 17 муниципалитетда тIугъвал акатнавайбурун кьадар артух хьана, 14 муниципалитетда азар акатунин барадай гьалар пайгардик квач, 21 муниципалитетда чна и азар акатзавайбурун кьадар авайдалай артух тежезвайди тестикьарзава”, — лагьана С.Меликова.
Региондин регьберди къейд авурвал, Оперативный штабдин махсус къарарралди агьалийриз инсанар гзаф кIватI жезвай чкайра маскаяр алаз къекъуьн меслят къалурнавай: COVID-19 инфекция, сезонда грипп ва ОРВ акатзавайбурун кьадар артух жезвай шартIара чкIизвайвилихъ галаз алакъалу яз эцигзавай сергьятвилер къанунламишунин патахъай фагьум-фикирдай вахт тIебиидаказ алукьнава. Идалайни башкъа, республикадин Верховный суддин судебный коллегиядихъ ва прокуратурадихъ галаз меслятар авунин нетижайри къалурзавайвал, маскаяр алукIунин къайдадал амал тавунай агьалияр жавабдарвилиз чIугвадай мумкинвал гьелелиг авач. Ида зулунни хъуьтIуьн девирда эпидемиологиядин жигьетдай гьалар пис хьунал гъун мумкин я”, — малумарна региондин регьберди.
Инсанрин саламатвал хуьн Сергей Меликова кьилин везифа тирди къейдна. И мураддалди регионда гзаф инсанар санал кIватI жезвай серенжемар кьиле тухун сергьятламишун фикирдиз къачузва.
Заседанидал республикадин кьилин санитарный духтур Николай Павловни рахана. Ада тIугъвалдин барадай республикада гьихьтин гьалар аватIа, адан вилик пад кьунин кIвалах гьикьван дережада идара ийиз жезватIа, гьакIни сергьятвилер эцигунин алава серенжемар кардик кутунин чарасузвал авани авачни, гьадан патахъай лагьана.
Гьахъ-гьисаб ийизвай гьафтеда COVID-19 акатунин дуьшуьшар ахтармишдай вахтунда тайинарнавайвал, 30 процент дуьшуьшра инфекция мукьва-кьилияр, хизан себеб яз акатзава. И азар акатнавай 58,9 процент ксари чеб инсанар гзаф кьадарра санал кIватI жезвай чкайра хьайидакай — башсагълугъвал гуз фейидакай, мехъеррин мярекатра иштирак авурдакай, алишверишдин центрайра, базарра, мискIинра хьайидакай лугьузва.
Николай Павлова къейд авурвал, Гумбет, Казбек, Къизилюрт, Къумторкъала, Мегьарамдхуьруьн районра ва Хасавюрт, Къизилюрт шегьерра тIугъвалдин мукара дезинфекция тамам дережада кьиле тухун тийизвайди къейдна.
Гьалар гуьзчивилик кутунин таъсирлу серенжемар кьабулунин мураддалди Николай Павлова региондин нормативно-правовой актунин бинедаллаз жуван саламатвал хуьдай такьатар, маскаяр ишлемиш тавунай административный жигьетдай жавабдарвилиз чIугун теклифна.
Ада РД-дин мулкунал инсанар гзаф кIватI жезвай общественный чкайра, общественный улакьра, гьа гьисабдай яз шегьердин патарив гвай чкайриз рейсер тамамарзавай поездра маскаяр алаз къекъуьнин къайда кардик кутун меслятна.
Роспотребнадзордин РД-да авай Управленидин руководителди хсусиятдин вири жуьрейрин организацийра ва идарайра работникри пакаман ахтармишун кьиле тухунин, маскаяр алаз къекъуьнин, дезинфекция авунин къайдайрал амал авунин патахъай кIвалахдалди таъминарзавай ксаривай ийизвай истемишунар гужлу авун теклифна.
Николай Павлован гафаралди, 65 йис хьанвай ва идалай чIехи яшара авай ксари чпи чеб масадбурухъ галаз алакъада гьатуникай хуьнин къайдадал амал авуниз талукь къарар кьабулуниз талукь месэладизни килигун герек я.
Ведомстводин регьбердин малуматдихъ яб акалайдалай гуьгъуьниз Сергей Меликова ганвай вири теклифар чарасузбур тирди къейдна. Идахъ галаз алакъалу яз региондин регьберди РД-дин Кьилин ва Гьукуматдин Администрациядал а теклифар веревирд хъувун, къанун-къайдадихъ галаз кьунин барадай меслятар авун ва гьа идан бинедаллаз гьукуматдихъ галаз санал Указдин проект гьазурун теклифна.
Дагъустан Республикада азарханадилай къерехда стIалжемдик азарлу хьанвайбуруз ва коронавирусдин цIийи инфекция акатнавайбуруз медицинадин рекьяй ерилу куьмек гунин барадай кьабулзавай серенжемрикай малумат РД-дин здравоохраненидин министр Жамалудин Гьажиибрагьимова гана.
Адан гафаралди, къенин йикъалди азарханадилай къерехда стIалжемдик азарлу хьанвайбуруз ва COVID-19 акатнавайбуруз медицинадин рекьяй куьмек гун патал медицинадин 51 организацияда 3226 койка эцигнава. Абурукайни 1518 койка кислороддик кутаз жедайвал тадаракламишнава. Чи республикада кислораддик кутазвай 2689 койка, ИВЛ-дин аппарат кутазвай 1044 койка тадаракламишнава, кислораддин 1800 концентратор кардик кутунва.
Жамалудин Гьажиибрагьимова хабар гайивал, алай вахтунда 809 койка азад я.
Идалай гъейри, дарманар маса къачун патал 71 миллион манатдин такьатар ва кьилдин ксар хатасуз ийидай шейэр маса къачун патал 300 миллион манатдилай виниз такьатар кIватIнава.
Мадни гегьенш делилар Дагъустандин Кьилин сайтдай къачуз жеда.
«Лезги газет»
