И йикъара Дагъустандин Кьил Сергей Меликова Россиядин Игит Темирлан Абуталимовахъ галаз гуьруьш кьиле тухвана. РикIел хкин, ада «Время героев» программадин сергьятра аваз, вичин пешекарвилин тежриба хкажзава. И жигьетдай Игитдин насигьатчи Сергей Меликов я.
Т. Абуталимова хабар гайивал, программадин сергьятра аваз, ада кьвед лагьай модулни акьалтIарнава ва, Дагъустандилай гъейри, ам Сахалиндин, Нижний Новгороддин областриз фена, регионрин гьукумдин органрин кIвалахдихъ галаз мукьувай таниш хьана. Къейд ийин хьи, Т.Абуталимоваз финансрин ва экономикадин хел мукьва я, гьавиляй ада стажировкадин вахтунда и хилез артух фикир гана.
Сергей Меликова маса регионрин гьукумдин органрин кIвалахдихъ галаз таниш хьун хъсан кар тирди къейдна ва Т. Абуталимоваз парламентдин ва муниципалитетрин кIвалах чируниз кьетIен фикир гун теклифна.
«Время героев» программа РФ-дин Президент Владимир Путинан теклифдалди арадал гъанва. Адан сергьятра аваз, государстводин къуллугъдин идарайра кIвалахдай ниятар авай СВО-дин иштиракчийриз ва ветеранриз пешекарвилин дережа хкажиз куьмекзава.
Чи мухбир
