И йикъара Докъузпара райондин Миграгъ-Къазмайрин хуьруьн аялрин бахчада «Школада кlелдай вахтунилай вилик квай яшда авай аялриз экологиядин жигьетдай тербия гун» темадай семинар кьиле фена. Ана райондин образованидин управленидин методистри, аялрин бахчайрин заведующийри ва тербиячийри иштиракна.

Семинардин иштиракчийрихъ элкъвена рахай райондин образованидин управленидин методист Тамара Муллинади къейд авурвал, аялриз экологиядин культурадин жигьетдай тербия гунин кардиз бахчайра са акьван фикир гузвач.

Семинар адетдинди тушир къайдада – къугъунин жуьреда тухвана. Гуьрцелдал мугьманар Баба Ягади кьабулна. Гуьгъуьнлай педагогар дестейриз пай хьана, гьар дестеди тапшуругърикай ибарат карта къачуна. Къугъунин нетижада тербиячийри аялриз экологиядин тербия гуниз талукь тир кар алай суалар дуьздал акъудна. Мастер-классар къалуруналди, педагогрилай хкянавай темадин важиблувал къалуриз алакьна. Гуьгъуьнлай «Дуствилин аллея» серенжемдин сергьятра аваз иштиракчийри муьтквер тарар санай акъудна, масаник кутуна.

Нубатдин семинар алай йисан ноябрдин вацра Мискискарин «Солнышко» бахчада тухун патал лишанлу куьлег и бахчадин заведующий Б. Вердихановадив вугана.

«Лезги газет»