6-апрелдиз Сулейман-Стальский райондин Курхуьруьн М.Рагьимован тIварцIихъ галай 1-нумрадин мектебда, Виридуьньядин столдин теннисдин йикъаз талукьарна, теннисдай ачух турнир тухвана. Идакай «Лезги газетдиз» райадминистрациядин пресс-къуллугъди хабар гузва.

Турнирда чпин мумкинвилерал сергьят алай инсанризни иштиракдай мумкинвал авай. Столдин теннис машгьур авунин, и къугъунал рикI алайбурун устадвал хкажунин макьсаддалди кьиле тухвай мярекат райондин спортдин, туризмдин ва жегьилрин крарин рекьяй комитетди тешкилна.

Акъажунрин нетижада чIехибурун арада сад лагьай чка – Абдул Амрягьова, кьвед ва пуд лагьай чкаяр Марсель Османовани Рашид Агьмедова  кьуна.

Мектебда кIелзавайбурун арада сад лагьай чкадал Ислам Алиев хьана. Кьвед ва пуд лагьай чкаяр Альберт Абдулманафова ва Ченгиз Сефиханова кьуна.

Рушарин арада сад лагьай чка Амина Абдулмуниновади кьуна; кьвед ва пуд лагьай чкаяр – Анита Мустафаевадини Флорида Гьажиевади.

Агалкьунар хьайибуруз медалар, грамотаяр гана.

«Лезги газет»