Дербент шегьерда яшайишдин кIвалер, мектебар, аялрин бахчаяр ва маса дараматар эцигунихъ галаз санал шегьердин паркарин ва скверрин кьадарни артух жезва. И барадай ина генани са цIийивал, артуханвал арадал гъизва — чIехи майданда мукьвал вахтара “Патриот” (“Ватанперес”) тIвар алаз женгининни ватанпересвилин паркни кардик акатдайвал я.
Шад жедай кар ам я хьи, и барадай шегьердин администрациядин тереф гзаф ведомоствойрин руководителри, РФ-дин оборонадин министерстводини хвена.
“Патриот” паркуна яракьлу къуватрин жуьреба-жуьре (ишлемишуниз герек амачир) техникадин экспонатар жеда. Абурукай са шумуд гьеле чкадал хканва. Маракьлу кар: паркунин лап чIехи ва квайни-квай экспонат шегьердиз Каспийскдин флотилиядин командованиди ганвай “Каспийдин монстр” — “Лунь” экраноплан жеда.
Къейдна кIанда хьи, “Патриот” паркуна, анаг арадал атайла, жегьилар аскервиле къуллугъуниз гьазурдай мярекатар, акъажунар ва акьалтзавай несил ватанпересвилин руьгьдаллаз тербияламишдай крарни тешкилда. Дербентда жедай цIийи парк и барадай уьлкведа тек-туьк авайбурун жергедик акатда.
Нариман Къарибов
