Чаз кхьизва
Кьурагь райондин КIирийрин хуьре авай почтадин алакъадин отделенида анин начальник Азизова Саимата ва почтальонкаяр тир Бабахваева Селиматани Къаибханова Фатмади гьакъисагъвилелди зегьмет чIугвазва.
Абурулай жемятди разивалзава: агьалийрин суалриз жавабар гузва, аялрин ва маса пособияр, газетар-журналар вахт-вахтунда ахгакьарзава.
“Лезги газет” кхьизвайбурун кьадар йисалай-суз тIимил жезва лугьуз, абуру бейкефвалзава. Мисал яз, 2020-йисуз КIирида хайи чIалал акъатзавай кьилин газет 59 касди кхьенва. Райондин “Дагъдин булах” газет кхьенвайбурун кьадар лагьайтIа, 37 кас я.
Къейд ийин хьи, идалай вилик газдин, экверин пулар чкадин агьалийри почтадин отделенида гузвай. Гила и кар хъийиз жезвач. Са гьихьтин ятIани икьрарар цIийи хъувуна кIанзава лугьузва. Гьакъикъи себеб гьихьтинди ятIа, чаз малум туш.
Ихьтин гьалара, чун, КIирийрин хуьруьн агьалияр, газдин, экверин пулар гун патал вацра садра, рекьиз 140 манатдив агакьна харж ийиз, я Кьурагьиз, я Кьасумхуьрел фена кIанзава. Са гафуналди, халкь кIеве гьатзава. Чкадал гуз жедай мумкинвал аваз, вучиз ятIани чун патал финиз мажбур жезва. За «Лезги газетдин» редакциядивай и месэладай кьил акъудун тIалабзава. Мумкин я, маса хуьрерани ихьтин гьалар арадал атун.
Мадни аламат жедай кар ам я хьи, вахт-вахтунда пул гузватIани, бязи дуьшуьшра, газдин, экверин пулар ганвач лугьуз, буржар хьанвайдакай хабар гузвай чарар хкведа. Идарадиз фена, квитанцияр къалурайла, бязи къаллугъчийри “чи тахсир вуч я, месэладай кьил акъудун патал суддиз кхьихь” лугьуз, меслятарни къалурда. Ибур гьикI арадал къвезвай буржар ятIа, садавайни тамамдиз ачухариз жезвач.
Играми «Лезги газетдин” редакция. За гьар йисуз еке ашкъидивди хайи чIалал акъатзавай газет кхьизва. Къе жуван яшар 85 йисав агакьайлани, за багъри газет кIелзава. Лагьана кIанда, газетдиз хъсан, фикир желбдай, хийир авай макъалаяр гзаф акъатзава. И карди изданидин дережани виниз акъудзава. Мумкинвиликай менфят къачуна, за виридаз, иллаки жегьилриз, акьалтзавай несилдиз, “Лезги газет” кхьиниз эвер гузва.
Анвар Къафаров, пенсионер, Кьурагь райондин КIирийрин хуьр
