Москвада авайла, Дагъустан Республикадин Кьил Сергей Меликов “Россети” ПАО-дин генеральный директор Андрей Рюминахъ галаз гуьруьшмиш хьана ва абуру РФ-дин Президент Владимир Путина регион электроэнергиядалди таъминарунин гьакъиндай гайи тапшуру­гъар кьилиз акъудунин гьал веревирдна. Идан гьакъиндай “Лезги газетдиз” РД-дин Кьилин пресс-къуллугъди хабар гана.

Кьве терефни электросетрин комплекс ва иесисуз сетар сад авунин мураддалди инвентаризация ва лазим документар ­гьазуруниз талукь кIвалахар кьиле тухузвай гьалдиз килигна. Алай вахтунда “Россети Северный Кавказ” компанияди агьалияр электроэнергиядалди таъминарзава        0,4-10 кВ-дин пайдай сетрин умуми кьадар­дин 43 процент ишлемишзава.

Электросетрин карханаяр модернизация авуникай ихтилатдайла  къейдна хьи, алай вахтунда Россиядин Гьукуматда 2022-2023-йисара электроэнергиядалди таъминарунин умудлувал артухарунин программа гьазурзава. Адан сергьятра аваз электроэнергиядихъ галаз алакъалу объектар цIийикIа туькIуьр хъийида, абур цIийи тадаракралди таъминардай мумкинвал гуда.

“Чи арада менфятлу рахунар кьиле фе­на. РФ-дин Президентди Дагъустандин гьа­къиндай ганвай тапшуругъриз талукь яз тамамардай гьакъикъи крар тайинарна­. Гьелбетда, сифте нубатда садан гъиликни квачир сетар, иллаки иесисузбур, сад ийида.

Электроэнергиядалди таъминарунин умудлувал артухарзавай программа уьмуьрдиз кечирмишуниз талукь тежриба­ лап хъсанди яз гьисабиз жеда. Ада сетар модернизация ийидай ва куьгьне хьанвайбур цIийи хъийидай мумкинвал гузва. Зун умудлу тирвал, и программа чна алай йисуз кьилиз акъудда.

“Россети Северный Кавказ” компанияди хъуьтIуьз гьазур хьун патал чара ийизвай пуларин кьадар гзафарзава. Эгер алатай йисуз 891 миллион манат чара авун­вай­тIа, цIи и рекъем са миллиард манатдиз барабар жеда”, — къейдна С.Меликова.

“Чна Дагъустан Республикадин гьу­кум­дин идарайрихъ галаз сих алакъада аваз кIвалахзава ва агьалияр ерилу электроэнергиядалди таъминарунин кIва­лах хъсанарзава. Им регион пайгардик кваз вилик тухун патал герек кар я.

Пуларин гьакъиндай кьитвал гьисс­завайтIани, эхиримжи кьве йисуз чалай электросетриз талукь карханаяр, тадаракар ремонт авуниз харжзавай пуларин кьадарар артухариз алакьна. Амма цIуд йисаралди кIватI хьанвай месэлаяр гьялун патал мадни алава пулар ва серенжемар герек къвезва.

Алай вахтунда федеральный дережада аваз гьазурзавай электроэнергиядалди таъминарунин умудлувал артухаруниз талукь программа мукьвал вахтара тахьай­ хьтинди я. Ада чаз гзаф месэлаяр гьялиз­ куьмек гуда”, — лагьана Андрей Рюмина.

Мишустинан регьбервилик кваз

18-январдиз Сергей Меликова РФ-дин Гьукуматдин къвалав гвай координационный советдин президиумдин заседанида иштиракна. РФ-дин Премьер-министр Ми­хаил Мишустинан регьбервилик кваз кьиле фейи мярекатдал коронавирусдин цIийи штамм чукIунихъ галаз женг чIугуни­кай ихтилат фена.

М.Мишустина къейд авурвал, вирусдин цIийи “омикрон” штамм виридуьньяда лап йигиндаказ чкIизва. Идахъ галаз ала­къалу яз РФ-дин Президентди здравоохраненидин идарайра, начагъ жезвай азарлуяр кьа­­булдай чкаяр гьазурун патал­ алава серенжемар кьабулунин план туь­кIуьрунин тапшуругъ ганвайдакай ла­гьа­на. Ада гьакI регионрин кьилерал “омикрон” штамм чукIу­низ акси алава кIва­лах тухун тапшурмишна.

Михаил Мишустина регионрин кьилерин вилик эцигнавай алава серенжемар ихьтинбур я: инфекция гегьенш хьунин ви­лик пад кьун, здравоохраненидин идараяр бес кьадарда дарманралди таъминарун, агьалийрин патай къвезвай арзайрихъ вахтунда яб акалун ва абуруз вири жуьредин куьмекар гун.

Мярекатдал малумарайвал, уьлкведин здравоохраненидин идарайра коронавирусдик начагъбур гзаф хьунихъ галаз алакъалу яз гьазурвилер аквазва. Россиядин Гьукуматдини, Президентдин тапшуругърин сергьятда аваз, алава серенжемар кьабулзава. Алава дарманар маса къачун патал регионриз 5 миллиард манат пул рекье тунва. Идалайни гъейри, саналди закупкаяр авун патални 15 миллиард манат чара ийида.

РикIел хкин, 15-январдиз Сергей Ме­ликован регьбервилик кваз Махачкъалада коронавирусдиз акси оперштабдин нубатдин заседание кьиле фенай. Анал  региондин Роспотребнадзордин регьбер Николай Павлова малумарайвал, эхи­рим­жи йикъара вирусдик начагъ жезвайбурун кьадар 50 процентдин гзаф хьанва.

Гзафни-гзаф вирусдик инсанар Дербент, Леваша, Мегьарамдхуьруьн, Новолак, Къарабудахкент районра, Дагъустандин Огни, Каспийск ва Махачкъала ше­гьерра начагъ хьана. Эгер яш  60 йисалай виниз хьанвай агьалийрин арада начагъбур тIимил жезватIа, азарлу аялрин кьадар гила гзаф жезва.

 «Лезги газет»