Дяведин махсус серенжемда иштиракнавайвилин гьакъиндай справка гила МФЦ-дин идарадай къачуз жезва. Ам мобилизациядин сергьятра аваз къуллугъзавайбурувайни, РФ-дин оборонадин министерстводихъ галаз кутIуннавай икьрардин бинедаллаз къуллугъзавайбурувайни къачуз жеда. И справка военный къуллугъ кьилиз акъудзавайбуруз ва абурун хизанриз жуьреба-жуьре кьезилвилер къачун патал чарасуз я.
Идалай вилик ихьтин справкайриз талукь сад тир къайда авачир, амма 1-ноябрдилай СВО-дин иштиракчидин дережа тестикьарзавай сад тир документ кардик акатнава.
Справка къачун патал МФЦ-диз гьам СВО-дин иштиракчидивай, гьам адан уьмуьрдин юлдашдивай, гьам маса хизанэгьлидивай физ жеда. Документ къачун патал МФЦ-диз фидайди СВО-дин иштиракчи вич яз хьайитIа, адав паспорт хьун чарасуз я. Эгер адан мукьва-кьилияр физ хьайитIа, абурув мукьва-кьиливал тестикьарзавай документар хьана кIанда. И къуллугъ 4 йикъан муддатда кьилиз акъудзава. Эгер бязи делилар тестикьар хъувунин чарасузвал аваз хьайитIа, справка туькIуьрун вацран муддатдал кьван давамар хъувун мумкин я.
Къейд ийин, 1-ноябрдилай кардик акатнавай сад тир документди СВО-дин иштиракчийриз гьам федеральный, гьам региондин дережайрин кьезилвилер ва яшайишдин рекьяй талукь тир куьмекар регьятдаказ тайинардай мумкинвал гуда. Ихьтин дегишвал уьлкведин оборонадин министр Андрей Белоусован теклифдалди кухтунва.
МФЦ-дин идарадиз финилай гъейри, и справка «Госкъуллугъар» порталдин куьмекдалдини туькIуьриз жезва.
«Лезги газет»
