Яран суварин вилик квай йикъара Кьурагьа, райцентрадал, Кьиблепатан Дагъустандин районрин хкянавай командайрин арада волейболдай Яран сувариз талукьарнавай акъажунар кьиле фена. Къизгъин къугъунрин нетижада 1-чкадиз Кьурагь райондин команда лайихлу хьана. Ахцегь ва Хив районрин (АрхитIрин хуьруьн) командайри, талукь тирвал, 2 ва 3-чкаяр кьуна.
Гъалиб хьайи командайриз кубокар, грамотаяр, дипломар ва пулдин пишкешар гана. Турнирдин тешкиллувилин комитетди мугьманар патал сувариз талукь тегьерда суфраярни ачухнавай. Хушвилелди кьабулунай мугьманри тешкилатчийриз сагърай лагьана.
* * *
21-мартдизни Кьурагьа, райцентрадал алай спортдин дворецда, спортдин милли жуьрейрай (армспортдай, турникдал чене акъудунай, канат ялунай ва мсб.) райондин хуьрерин хкянавай командайрин арада акъажунар кьиле фена, са шумуд сятда жегьилри чпин устадвал къалурна. Судьяйрин коллегиядин къарардалди, 1-чкадиз ва кубокдиз Кьурагьрин хуьруьн команда лайихлу хьана. Гъалиб хьайи ва призерар тир командаярни кубокар, медалар, дипломар ва пулдин пишкешар гуналди къейдна. Са гафуналди, суварин паяр виридав агакьна. Абурув райондин администрациядин кьилин заместитель Рамазан Катибова, физический культурадин ва жегьилрин крарин рекьяй отделдин начальник Рамиз Рамазанова шабагьар вахкана.
«Лезги газет»
