“Лезги газетдиз” Дербентдин администрациядин пресс-къуллугъди хабар гайивал, чи халкьдин машгьур хва Сулейман Керимова Дагъустандиз коронавирусдин тIегъуьндихъ галаз женг тухунин карда куьмекар гузва. Мукьвара ада Дербент шегьердин кьилин азархана патал медицинадин тадаракар, дарманар ва сагъар хъувунин карда герек къведай хейлин затIар маса къачунва.
Сулейман Керимова вич куьмек гуз гьазур тирдакай алатай гьафтеда хабар гана. РД-дин здравоохраненидин министерстводи шегьердин кьилин азарханадин руководстводихъ галаз санал республикада коронавирусдин вилик пад кьунин жигьетдай герек къвезвай затIарин сиягь туькIуьрна. Ана ИВЛ (искусственный къайдада жигеррин кIвалах кардик кутазвай) аппаратар, пульсоксиметрияр, тепловизорар ва маса тадаракар къалурнавай.
Абур маса къачуниз Сулейман Керимова 1,5 млрд манатдилай виниз пулдин такьатар чара авуна.
Къейд ийин хьи, медицинадин тадаракрин са пай къецепатан уьлквейрай маса къачунвай. Абур вири Дербент шегьердив ахгакьаруниз акъатзавай харжиярни мергьяматлувилел машгъул жезвай карчиди вичин хивез къачуна.
«Лезги газет»
