18-майдиз Агъа Стlалдал чlехи шаир, “ХХ асирдин Гомер” Стlал Сулейманан 150 йисан юбилей гурлудаказ къейдна.

Сятдин кlуьдаз Советский хуьрелай Кьасумхуьруьхъ элкъвезвай  рекьин къекъуьндал алай Стlал Сулейманан мемориалдал инсанар кlватl жез гатlумна. Цlуд хьайила, анаг Махачкъаладай ва маса шегьеррайни хуьрерай атанвай инсанрив ацlана.

Аниз Сулейман-Стальский райондин кьил Нариман Абдулмуталибов, Кьурагь райондин кьил Замир Азизов, Дагъустандин писателрин Союздин председатель Мегьамед  Агьмедов, Россиядин писателрин Союздин правленидин секретарь, шаир, публицист  Иван Голубничий, РД-дин Халкьдин Соб­ранидин депутат Гьамидуллагь Мегьамедов, Ба­кудай шаир Седакъет Керимова, Да­гъус­тан­дин халкьдин шаир Багьаудин Аджиев, РД-дин милли по­ли­тикадин ва диндин крарай министр Энрик Муслимов, Коммунист­рин партиядин Дагъустандин Рескомдин сад лагьай секретарь  Магьмуд Магьмудов, “Лезги газетдин” кьилин редактор Мегьамед Ибрагьимов, Лезгийрин госмуздрамтеатрдин директор Динара Эми­нова ва кьилин режиссер Мирзебег Мирзебегов,  ДГУ-дин профессор Мегьамед  Мегьамедов, Ярославлдай хтанвай шаир, писатель ва таржумачи Мамед Халилов ва масабур атанвай.

Мугьманри, райондин кьили ва аялри Стlал Сулейманан мемори­ал­дал цуькверин кlунчlар эцигна. Инал Герейханован хуьруьн СОШ-дин аялри фасагьатдаз шиирар кlел­­на, рикlел аламукьдай шикилар яна.

Ахпа инлай вири Агъа СтIалдал рекье гьатна.

Мугьманар цlийиз туькlуьр хъувунвай музейдиз килигна.

Межлисдиз мирзевал Ярагьмед Ярагьмедова авуна. Микрафондихъ Нариман  Абдулмуталибов га­ла:

— За Стlал Сулейманан чилел атанвай мугьманриз: куьн атуй, рагъ атуй лугьузва. Чlехи шаир, гражданин, машгьур лезги Стlал Сулейман­ дидедиз хьайидилай инихъ 150 йис тамам хьанвай мярекатра куьне иштирак авуни чун вири садзава.

Накь Махачкъалада  Стlал Сулейманан юбилейдин мярекатар шад гьалара кьиле фена. И мум-кин­виликай менфят къачуна, заз рес­публикадин руководстводиз, министерствойрин векилриз, Да­гъустан­дин писателрин Союздиз сагъ­рай лугьуз кlанзава, — къейдна ада.

Мегьамед   Агьмедов:

— Зи рикlел Агъа Стlалдал эхиримжи сеферда Расул Гьамзатов атай вахт хтана. Ам и чилихъ галаз, Сулейманахъ галаз гуя эхиримжи сеферда гуьруьш жезвайди хьиз авай. Ада чпин руьгьдин мукьвавал гьиссзавай. Сулеймана Дагъустан маш­гьур­на, Расул Гьамзатова адан кар давамарна.

Стlал Сулейман цlийи девир­дин­ шаир тир. Эгер “СССР-дин Халкь­дин шаир” лагьай тlвар авайди тир­тlа, эвелни-эвел ам, са шакни алачиз, Сулейманаз гудай. Ам эбеди яз чlехи ша­ир яз амукьзава. Ада­кай чпин фикирар Шолохова, Леонова, Тихонова, Пастернака, Мандельштама ва хейлин масабуру лагьанва.

Иван  Голубничий:

—  Гьуьрметлу дагъустанвияр, играми дустар, агъастlалвияр!

Къе чна, Дагъустандин ва Россиядин кьегьал хва, СССР-дин, Да­гъустандин чlехи шаир Стlал Су­лей­манан юбилей сувар хьиз кьиле тухузва.

За Россиядин писателрин Мос­к­ва шегьердин писателрин союзрин ва жуван тlварцIихъай квез и чlехи сувар мубаракзава.

Гьамидуллагь  Мегьамедов:

— Заз куь фикир С.Сулеймана ая­лар патал кхьенвай шииррал желб ийиз кlанзава. Сулейманакай рахадайла, адан яратмишунрин и хел кваз кьазвач. Ам школа-интернатриз фидайди тир. Тlуьнни гуз, кlел-кхьин чирзавай аялар акурла, ам гзаф шад жедай. Ада лугьудай: “Играми ая­лар, кlела, чира, заз квез хьиз кlелиз-кхьидай мумкинвал хьайиди туш”.

За, куь виридан тlварцlихъай, эгена куьн акси туштlа, депутатдин запрос кхьида. Дагъустандин госуниверситетдиз эвелдай адал алай тlвар, яни Стlал Сулейманан тlвар хгун патал. Заз чиз, и вахт алукьна­ва. Чlехи инсанрин тlварар эбеди ийидай законни кьабулнава.

И хабар халкьди гурлу капар ягъуналди кьабулна.

Мегьамед  Ибрагьимов:

— Стlал Сулейманан 150 йисан юбилей — им неинки тек са лезги халкьдин, гьакlни вири Дагъустандин, вири уьлкведин сувар я. Икl тир­­­ди къе къурмишнавай мярекатдин гурлувили, сергьятри, инал рахазвай чи мугьманрин ялавлу келимайри, са куьруь вахтунда арадал хкай шаирдин кlвали-музейди субутзава.

Эгер лезги чили, лезги халкьди­, чаз Стlал Сулейман хьтин зурба бажарагъ багъишнаватlа, и чилел ихь­тин­ цlирер ва бегьерар мадни хъжеда.

Ахпа анал Багьаудин Аджиев, Энрик Мус­лимов, Магьмуд Магьмудов, Динара Эминова, профессор Мегьамед  Мегьамедов, Седакъет Керимова, Мамед  Халилов, Лидия Стальская рахана. Эхирдай юбилейдин концерт башламишна.

«Лезги газет»