21-сентябрдиз Дагъустан Республикадин Кьилин везифаяр вахтуналди тамамарзавай Сергей Меликова республикадин  чимивилинни энергетикадин комплексдин ва ЖКХ-дин карханаяр, идараяр хъуьтIуьз гьазурунин рекьяй республикадин штабдин рабочий дестедихъ галаз саналди тир заседание кьиле тухвана.

Региондин Кьили къейд авурвал, къенин юкъуз республикадин чимивилинни энергетикадин комплекс хъуьтIуьз гьазурун лап кар алай месэлайрик акатзава. “Алатай хъуьтIуьз чун ЖКХ-дин объектар бегьемвилелди хъуьтIуьз гьазур тавунин са шумуд жуьредин месэлайрал расалмиш хьана. Мисал яз, турбайра газдин дав­ление, электросетра бес кьадарда напряжение авачиз, гзаф инсанрин кIвале­ра мекьивал гьатна. Гьатта инсанрал дуьшуьшарни атана”, — рикIел хкана Сергей Меликова. Ада кIватI хьанвайбуруз сифте нубатда инсанрин гьакъиндай фикир авуниз, абурун къайгъу чIугуниз эвер гана. Къейд авурвал, кIвалер, идараяр неинки хъуьтIуьз, гьакI гатун варцарани электроэнергиядикай хкудзава, газдин майишатда аварияр жезва.

Ихьтин татугайвилер тахьун ва и ва­жиб­лу кIвалахда хъсан патахъ дегишвилер тун патал гъилевай йисуз зулунни хъуь­тIуьн гьалариз гьазур хьунин месэла гуьзчивилик кутунва. Гьа са вахтунда винидихъ тIвар кьунвай идарайри чпин кIвалахда рехъ гузвай татугайвилерни дуьздал акъудна ва абуруз талукь тир  къимет гана. Малум хьайивал, чкадин  самоуправленидин органри чимивилинни энергетикадин комплексдин карханаяр, сетар, линияр ремонтуниз, абурун материально-технический база мягькемаруниз бес кьадарда пулар чара ийизвачир.

— Алай вахтунда, муниципальный тешкилатрин делилралди, хъуьтIуьз гьазур хьу­нихъ галаз талукь кIвалахар 89 процентдин кьилиз акъуднавалда, — къейдна республикадин Кьили. — Амма Ростехнадзордин пешекарри тухвай ахтармишунрин нетижада малум хьанвайвал, Махачкъаладин, Дагъустандин Огнидин, Дербентдин, Южно-Сухокумскдин, Къизилюртдин, Каспийскдин, Избербашдин агьалияр хъуь­тIуьз тамамвилелди чимивилелди таъ­­минарунин кIвалахда са бязи татугайвилер амазма. “Мад сеферда рикIел хкизва, 1-ноябрдалди социальный объектриз та­мамвилелди чимивал гудайвал авуна кIанда. Гьа са вахтунда санитариядинни эпидемиологиядин гьаларни чIур тежедайвал авун чи везифа я”, — лагьана Сергей Меликова.

Сергей Меликова къейд авурвал, “Россети Северный Кавказ” ПАО-дин “Даг­энерго” филиалди республикадин элек­тро­­сетрин майишат зулунни хъуьтIуьн гьа­­ла­­риз гьазурунин программадин сергьятра аваз 35 районда 891 миллион манатдин къи­мет авай кIвалахар кьиле тухузва. Гьа са вахтунда Махачкъала ше­гьерда кьиле ту­худай сифте нубатдин серенжемар патал ПАО-дин патай гьелелиг пулар атан­вач.­

Идалайни гъейри, “Газпром газорас­пределение Дагестан” ООО-динни газо­рас­­пределительный сетрин арада гьуьжетдин, къайдадик кутун тавунвай месэлаяр амаз­ма.­

ЖКХ-дин карханаяр, идараяр 2021-2022-йисарин зулунни хъуьтIуьн гьалариз  гьазур хьунин рекьяй республикадин штабдин кIвалахдикай РД-дин Гьукуматдин Председатель Абдулпатагь Амирханова суьгьбетна. Премьер-министрди хабар гайивал, республикадин агьалияр хъуь­тIуьн варцара чимивилелди, электроэнергиядалди таъминарунин ва алатай йисара хьайи аварийрин вилик пад кьунин мураддалди 105 миллион манат пул чара авунва. И пуларин гьисабдай Къизилюрт, Дагъустандин Огни, Хасавюрт ва Каспийск шегьерра  куьгьне котельнияр ва чимивилин сетар цIийи хъийида, ремонтда. Алукьзавай йисуз тIвар кьунвай чкайра  цIийи котельнияр кардик кутада. Социальный метлеб авай карханайра, гьа гьисабдай яз сифте нубатда больницайра модулдин цIийи котельнияр эцигунин месэла кьилди гьялзава. И крар патални бес кьадар пулар чара авунва.

Мярекатдал РД-дин государстводин яшайишдин инспекциядин руководитель Сергей Касьяновни рахана. Ада лагьайвал, инспекциядин пешекарри яшайишдин кIва­лерин фонд хъуьтIуьз гьазур хьунин гьалар­ датIана ахтармишзава. Куьрелди лагьай­тIа, республика зулунни хъуьтIуьн гьалариз гьазур хьунин кIвалах саки акьалтI­зава.

Зулунни хъуьтIуьн гьалариз энергетикадин ва газдин  карханаяр гьазур жезвай гьалдикай “Дагэнерго” филиалдин директор Мегьамед Абдурашидова ва “Газпром газораспределение Дагестан” ООО-дин испольнительный директор Ризван Гъазимегьамедова ихтилатна.

Мярекатдин эхирдай Сергей Меликова республика зулунни хъуьтIуьн гьалариз гьазур хьунихъ галаз алакъалу жавабдар вири  работникрин фикир са кардал желбна: “Алатай йисан хъуьтIуь чаз къалурна хьи, республика адаз тамамвилелди гьазур хьанвачир. Къе чун экономикадин жигьетдай гьихьтин четинвилера ава­тIани,  чна Россетрин ва Газпромдин векилрихъ галаз еке кIвалах тухузва. Ноябр­диз чна республика хъуьтIуьз гьазур хьунин нетижаяр кьада”.

«Лезги газет»