И йикъара Белиж поселокдин гимназияда лезгийрин машгьур лирик, бажарагълу шаир, ин­санперес ва ватанперес  Ших­несир  Къафланов  дидедиз хьайи­дилай инихъ 100 йис тамам хьуниз талукьарнавай шииратдин межлис кьиле тухвана.

Ана шаирдин хтул, Мегьарамдхуьруьн райондин Бут-Къазмайрин аялрин “Золушка” бахчадин педагог-логопед Лаура За­гьировади, Дагъустандин искусствойрин лайихлу деятель, композитор, “Лезги газетдин” хсуси мухбир Къагьриман Ибрагьимова, поселокдин кьуьлерин “Кавха” ансамблди, хореограф Сефербег Сефербегова, видеооператор Алибала Букарова, муаллимри ва аялри иштиракна.

Мугьманар мярекат кьиле физвай лезги чIаланни литературадин кабинетда авай лезги литературадизни чIалаз, шаирринни писателрин суьретралди хъсандиз безетмишнавай стенд­риз итижлудаказ килигна, шаиррин камаллу келимаяр кIелна, аялрихъ галаз суьгьбетарна.

Межлис Россиядин писателрин Союздин член, шаир Гъулангерек Гьажиевна Ибрагьимовади кьиле тухвана. Ада шаирдин уьмуьрдин ва яратмишунрин рекьикай таъсирдай хьтин суьгьбетна, Шихнесир Къафланов халкьдин рикI алай устадрикай сад тирди къейдна. Адан шиирар ва чIалариз кхьенвай манияр къени рикI алаз кIелзава, лугьузва. Межлисдин тамадади Мердали Жалилова шаирдин яратмишунриз къимет гузвай гафарни рикIел хкана: “Шихнесир Къафланов, чи кьатIунрай, хайи чIалан хазинадив эгечIунин ва ши­ир туькIуь­рунин устадвилин жигьетдай чи милли эдебиятда ан­жах са Етим Эминав гекъигиз жеда”.

Суьгьбетдин арайра аялри ша­­ирдин шиирар устаддиз кIел­на­. Рахайбуру Ш.Къафланован шииратдин тематика гьар жуьрединди, кьилин игит инсан тирди, шииррихъ Ватан, милли чIал, ин­сан кIанарунин жигьетдай еке метлеб авайди къейдна.

Шаирдин хтул Лаура Загьировади вичин чIехи бубадин уьмуьрдикай суьгьбетна, бязи къейдер ва “КIандай рикIиз” шиир кIелна, юбилей, икI гуьрчегдаказ гьазурна, кьиле тухвайбуруз сагъ­рай лагьана.

И цIарарин авторди Ш.Къаф­ла­новахъ галаз вич таниш хьайи­вал ри­кIел хкана. Адан лири­кадин­ на­зиквал, фикиррин де­ринвал къейдна ва вичи 1985-йисалай адан чIалариз — “Дидедиз”, “Эльмира”, “Июнь 30 лагьай”, “Ри­кIел къведа вун”, “Эхиримжи зенг” ва масабу­руз манияр кхьей­ди къейдна.

Мярекат экрандилай къалурай Къ.Ибрагьимова, С.Саидовади, ашукь Ширина  Ш.Къафланован чIалариз кхьенвай манияр лугьузвай роликри, Белиждин искусстводин школадин хореографиядин отделенидин кьуьлердай “Кавха” ансамблди тамамарай кьуьлерини гурлу авуна.

Къагьриман Ибрагьимов