Мегьамед Ярагъидин сур-зиярат михьидаказ, гьуьрметдивди хуьзва­. Ам чкадин­ гьар са агьалидин бейнида несилриз дуьз рехъ къалурзавай чирагъ хьиз ава.

Пакамахъ фад Махачкъаладай, Кьиб­лепатан Дагъустандай экъечIна Левашада кIватI хьана, Гуниб район галайвал рекье гьатай машинрин яргъи цIиргъ чкадин агьалийри еке итиж аваз кьабулза­вай. Зияратдал атанвайбурун гъилера авай Мегьамед Ярагъидин шикилар алай пайдахар гарал къугъвазвай. Дагъдин тик рекье­рай, тамарай физвай чун Согъ­ратл хуьруьв агакьна. Къадим хуьруьн дар куьчей­ра улакьар гьакь хъийиз­ма­чир. Яргъарай атанвай мугьманрин мурад Мегьамед Ярагъидин сурал зиярат авун тир. Согъратлдин агъсакъалри чун хушдиз кьабулна. Абуру чеб Мегьамед Ярагъидин — Кавказдин машгьур шейхдин, Да­гъус­тандин пуд имамдин муаллимдин невеяр иниз атунал шад тирди лагьана.

— Мегьамед Ярагъи — Дагъустандин халкьар дуьз рекьел гъайи, гзаф савадлу ва камаллу кас тир. Уьмуьрдин эхиримжи йи­сара ам Согъратлда яшамиш хьана. Ам ярагъви, дагъустанви ва, кьилинди, зурба алим, нахшибандий тIарикъат­дин шейх тир. И кар чун — алай несилдин векилар патал важиблу я, — къейд­на агъса­къалрикай сада.

Согъратлдин куьгьне сурарин патав вири кIватI хьайидалай кьулухъ мугьманар дуьаяр кIелиз-кIелиз, зикир ийиз-ийиз Ярагъидин сур галайвал фена. Атир галай­ жуьреба-жуьре векьер-кьалар экъечI­з­а­вай дагъдин тик чиник чIехи шейхдин сурал кIвал-минара туькIуьр­нава, патаривни гьа девирдин куьгьне сурар гва. Къванерал араб ва урус гьарфаралди тIва­рар, йисар, бязибурукай алава делиларни атIанва.

Зияратдал кIватI хьанвайбурухъ элкъвена Да­гъустан Республикадин Муфтиятдин Дербент шегьерда ва районда кардик квай просвещенидин отделдин регьбер Къурбан гьажи Рамазанов, Каспийск шегьердин жуьмя мискIиндин имам Сулейман Тагъи­бегов, Мегьарамдхуьруьн райондин имам Агьмад гьажи Мегьамедов ва масабур рахана. Абуру чи баркаллу ватан­эгьлидин уьмуьрдикай, алимвилин, шейхвилин, имамвилин рекьикай, адан муаллимрикайни сухтайрикай, алай девирдикай ва кьиле физвай вакъиайрикай гегьенш суьгьбетарна. Жегьилар дуьз рекьелай алат тавун патал вирида къуватар сад авун, ягъалмиш жезвайбур гъавурдик кутун, Ислам диндин дуьз рехъ, шейх Ярагъ Мегьамеда къалурнавай, ада ишигъ куькIуьрнавай гьакъикъи рехъ давамарун меслятна.

Гуьгъуьнлай зияратдал атанвайбуру сурара эцигнавай кIвализ физ, Мегьамед Ярагъидин тIварунихъ дуьаяр кIелна. Вирида зиярат авурдалай кьулухъ, мугьманар ва чкадин агьалияр хуьруьн мискIинда нисинин кпIунал кIватI хъхьана.

Серенжемдик кьил кутурбур, ам тешкилайбур Мегьамед Ярагъидин ругуд лагьай невеяр — Агьмад гьажи Мегьамедов ва Мурад Гьамидов я. Абурун мурад неси­лар Исламдин къанунрал амалдайбур, бубайрин, халкьдин тарих чизвайбур яз чIехи хьун я. Малум хьайивал, шейх Мегьамедан сурал Мегьарамдхуьруьн райондин векилар гьар йисуз физва. И сеферда ла­гьайтIа, иниз Махачкъала, Каспийск, Дербент шегьеррай, Кьиблепатан Дагъустандин вири районрай, Хасавюрт райондин ЦIийи Къурушрин хуьряй цIудралди машинар атанвай.

Къуй дуьньяда ислягьвал, гьуьрмет хьу­рай! Им, зи фикирдалди, гьар са касдин эрзиман мурад я.

Эмираслан Шерифалиев

Шикилар — Къудрат Алиеванбур