ЦIийи ктабар
И мукьвара “Мавел” чапханада филологиядин илимрин кандидат Азиз Мирзабегова Дагъустандин халкьдин шаир Арбен Къардашан 60 йисан юбилейдихъ галаз алакъалу яз гьазурнавай “Шаирдин арш” тIвар алай ктаб акъуднава. Ам, шаирдин гзаф терефрин яратмишунар ахтармишна, арадал атанвай метлеблу монографиядикай ибарат я. Авторди Арбен Къардашан шииратдиз, гьикаятдиз, тамашиятдиз, литературоведенидин илимда къачунвай камариз ва гьакIни таржумачивилин агалкьунриз илимдин рекьелди дериндай анализ ганва, кIелдайбуруз мукьва жедайвал авунва.
Ктабда гьакI юбилярдин яратмишунрикай жуьреба-жуьре авторри урус ва лезги чIаларал кхьенвай, идалай вилик илимдинни литературадин жуьреба-жуьре чешмейра чапнавай хейлин рецензияр, фикирар, зендер гьатнава.
Лагьана кIанда, а материалри идалай вилик ДНЦ-дин РАН-дин ИЯЛИ-ди акъуднавай филологиядин илимрин кандидат Сейфедин Бидирханован “Арбен Къардаш. Яратмишунрин сагьиб асиррин гирведал” ктабда гьатнавай фикирар тикрарзавач.
ЦIийи ктабда жуьреба-жуьре авторри Арбен Къардашаз бахшна кхьенвай хейлин шиирарни, шаирдин уьмуьрдин бязи вакъиаяр къалурзавай хейлин шикиларни гьатнава. Санлай къачурла, им гьам юбилярдиз ва гьам кIелзавайбурузни хъсан савкьат хьанва.
Ктабдин тираж 500 экземплярдиз барабар я.
Чи мухбир
