28-ноябрдиз Мегьарамдхуьруьн райондин Оружбайрин, Къуюстанрин ва Ярагъ-Къазмайрин хуьрера шадвилин гьалара паркар ачухна.
Республикадин “Зи Дагъустан — зи къулай шартIар” милли проект кьилиз акъудунин сергьятра аваз туькIуьрнавай паркара агьалийри — чIехибуруни аялри, сергьятламиш хьанвай мумкинвилер авай ксари ял ягъун патал герек шартIар тешкилнава. Паркарал мешреб — абур гъунин проектрал асаслу яз инсанар яхдиз къекъведай ва ял ядай чкайра плитка, куьчейра эквер тунва, аялар машгъулардай майданар туькIуьрнава, гуьрчег куьсрияр, зирзибил гадардай къапар эцигнава, кьуд пад къацу авунва.
Паркар ачухунин мярекатда Мегьарамдхуьруьн райондин кьил Фарид Агьмедова, райондин общественный палатадин председатель Агъадаш Нагъметуллаева, райондин администрациядин аппаратдин жавабдар къуллугъчийри, муаллимри, школьникри, яслийра, бахчайра тербия къачузвай аялри, хуьрерин агьалийри иштиракна.
Гьа и юкъуз Къартас-Къазмайрин хуьре “Зи Дагъустан — зи рекьер” проектдин сергьятра аваз, къир цана, хъсан къайдадиз гъанвай ругуд куьче ачухна.
Къейд ийин хьи, къведай йисуз райондин ирид хуьре жемятди менфят къачузвай чкаяр аваданламишунин кIвалахар кьиле тухудайвал я.
«Лезги газет»
