25-июлдиз Астрахандин областдин Казымяк шегьерда бине Хив райондин Хъукьварин хуьряй тир машгьур алим, хуьруьн майишатдин илимрин доктор, профессор, РФ-дин лайихлу агроном, РАЕ-дин академик Шамил Байрамбегович Байрамбегов рагьметдиз фена. Алимдин 76 йис тир.
Ш.Б. Байрамбегова яргъал йисара Вирисоюздин майвачивилинни багъманчивилин илимдинни ахтармишунрин институтда зегьмет чIугуна. Адан регьбервилик кваз арадал гъайи илимдинни производстводин «Виридис» ООО-ди селекциядин, набататар хуьнин, хуьруьн майишатдин жуьреба-жуьре культураяр гьялунин рекье чIехи кIвалах кьиле тухванай. Кархана вири Союзда машгьур тир ва адан бинедаллаз илимдин семинарар, конференцияр, элкъвей столар, маса мярекатар тешкилзавай.
Ш.Б. Байрамбегован гъиликай 340-далай виниз илимдин кIвалахар хкатна. Абурун арада 10 монография, методикадин 40 пособие ава. Алимдин регьбервилик кваз цIудралди пешекарри илимрин кандидатвилин, докторвилин диссертацияр кхьена, агалкьунралди хвена. Чи бажарагълу ватанэгьлиди датIана илимдин конференцийра, илимдин ахтармишунар кьиле тухун патал грантар чара ийизвай жуьреба-жуьре конкурсра иштиракзавай. 2007-йисалай инихъ ада МГУ-дин, Астрахандин областдин образованидин ва илимдин министерстводин, Гьукуматдин грантар къачуна.
Илимдин рекье къазанмишнавай агалкьунрай алим РФ-дин хуьруьн майишатдин министерстводин Гьуьрметдин грамотадиз, «Ватандин вилик лайихлувилерай» II дережадин, «Астрахандин областдин вилик лайихлувилерай» медалриз, «РФ-дин АПК-дин лайихлу къуллугъчи» тIварцIиз ва маса шабагьриз лайихлу хьана.
“Лезги газетдин” редакциядин коллективди, играми стха рагьметдиз финихъ галаз алакъалу яз, РД-дин образованидин ва илимдин министрдин заместитель Анжела Байрамбеговадиз, Тахо-Годидин тIварцIихъ галай институтдин илимдин къуллугъчи Марат Байрамбеговаз ва Мухтар Байрамбеговаз, вири мукьва-кьилийриз башсагълугъвал гузва.
