13-апрелдиз Дагъустандин Гьукуматда премьер-министр Артем Здунован регьбервилик кваз республикада коронавирусдихъ галаз алакъалу гьалар веревирд авуниз талукьарнавай заседание кьиле фена.
РД-дин Роспотребнадзордин кьил Николай Павлова хабар гайивал, регионда коронавирусдин тIегъуьндин жигьетдай ахтармишунар кьиле тухузвай лабораторийрин кьадар артухаруниз кьетIен фикир гузва. Алай вахтунда и кардал республикадин инфекцийрин уьзуьррин, Дагъустандин ва Махачкъаладин диагнозар эцигдай, гигиенадин ва эпидемиологиядин центрайра, тIегъуьнриз акси серенжемар кьабулдай станцияда кардик квай лабораторияр машгъул я.
РД-дин здравоохраненидин министр Жамалудин Гьажиибрагьимова хабар гайивал, коронавирус акатнавай дуьшуьшар республикадин 7 шегьердани 11 районда винел акъуднава.
“Кьиле тухвай мониторингдин нетижайри къалурзавайвал, алатай йисав гекъигайтIа, алай йисуз стIалжем акатнавайбурун кьадар гзаф хьанва. Къенин юкъуз республикада ихьтин азар акатнавай 137 дуьшуьш малум я.
Коронавирус акатнавай ксарикай рахайтIа, абурун 20 процент яшлу инсанар я. 60-65 процент 20-далай 60 йисал къведалди яшара авайбуру тешкилзава. Жегьилрилай тафаватлу яз, яшлубуруз тIегъуьндиз дурум гуз четин жезва. И карни абурун сагъламвал, санлай къачурла, зайифди хьунихъ галаз алакъалу я. Азарлубур югъди-йифди духтуррин кьетIен гуьзчивилик ква. Абур сагъар хъувун патал чна вири къуватар желбнава”, — къейдна Жамалудин Гьажиибрагьимова.
Заседанидин сергьятра аваз гьакIни коронавирусдин тIегъуьндиз акси яз кьабулзавай маса серенжемрикайни рахана. Абурукай гегьеншдиз РД-дин Гьукуматдин сайтдай кIелиз жеда.
* * *
РД-дин Роспотребнадзордин делилралди, 15-апрелдиз Дагъустанда коронавирус акатнавайбурун кьадар 105-дав агакьнава. Гьа са вахтунда духтуррилай тIегъуьн акатнавай 9 кас сагъар хъийиз алакьна. Санлай къачурла, республикада 7427 кас ахтармишнава, 2201 кас лагьайтIа, карантиндал ала. Коронавирусдин тIегъуьндик республикада пуд кас кьенва.
«Лезги газет»
