И йикъара Кеферпатан Кавказдин регионра акьалтIай къайдада чими хьанва. Пешекарри къейдзавайвал, 10-июлдалди гьавадин чимивал 38-42 градусдиз барабар жеда. Гьа жергедай яз, Дагъустандани.
Гьава садлагьана зегьемлу хьун себеб яз, республикадин жуьреба-жуьре пипIера цIаяр кьур дуьшуьшарни арадал атана. Тарки поселокда кул-кусар экъечIзавай рук кана, Махачкъалада зирзибил гадарзавай хъуртани, Эльтавдин тамуни цIай кьуна. Санлай къачурла, цIаяр кьур ирид дуьшуьш винел акъуднава. ЦIун вилик пад кьун патал РД-дин МЧС-дин къуватрилай гъейри, Урусатдин МЧС-дин цIай хкадардай са самолетни желбнава.
7-июлдиз Дагъустандин Гьукуматда премьер-министр Артем Здунован регьбервилик кваз республикадин мулкарал цIаяр кьунин месэла веревирдна.
Вичин рахунра Дагъустандин тамарин майишатдин Комитетдин председатель Вагьаб Абдулгьамидова къейд авурвал, махсус пландин бинедаллаз республикадин тамара цIаяр кьунин вилик пад кьунин серенжемар кьиле тухузва.
Адан гафаралди, республикадин са шумуд районда цIаяр кьунин хаталувилин 5-класс тайинарнава. Абурун арада Къизляр, Тарумовский, Ногъай, Сулейман-Стальский, Хасавюрт, Казбек, Буйнакск, Унцукул, Гергебил, Сергокъала районар ава.
— Санлай къачурла, Дагъустанда цIаяр кьур ирид дуьшуьш винел акъуднава, — лагьана В.Абдулгьамидова. — Абурукай 4 хкадариз алакьнава, Махачкъаладиз мукьва мулкара ва Казбек районда МЧС-дин къуллугъчийри цIухъ галаз женг давамарзава.
Артем Здунова РД-дин МВД-диз республикадин тамарин майишатдин Комитетдихъ галаз санал хъуртариз цIаяр ягъунал гуьзчивал тухун патал патрулар кардик кутун теклифна. Премьер-министрдин гафаралди, цIаяр кьур бязи чкайриз МЧС-дин техникадивай физ жезвач. И кардихъ галаз алакъалу яз, ада районрин ва шегьеррин кьилерал цIаяр кьунин хаталувал авай тамарин мулкариз МЧС-дин техникадивай физ жедай рекьер авани-авачни ахтармишун тапшурмишна.
Дагъустандин МЧС-дин кьил Нариман Къазимегьамедован фикирдалди, алай вахтунда виридалайни хаталу гьалар Казбек районда арадал атанва. Аниз цIай хкадарун патал алава къуватар рекье твадайвал я.
(Макъала куьруь авуна гузва.
Гегьеншдиз РД-дин Гьукуматдин сайтдай кIелиз жеда)
«Лезги газет»
