Мектебда санал кIелайбуру са шумуд йисалай гуьруьшар кьиле тухунин, жегьил вахтар рикIел хкунин, ихьтин мярекатрин куьмекдалди гьуьрметни дуствал яшар тамам хьайидалай кьулухъ мадни мягькемарунин адетар, авайвал лагьайтIа, чи йикъара са акьван машгьур туш. Амма ихьтин крарик кьил кутун пара хъсан кар тирди 1967-1978-йисара Миграгърин мектебда кIелай са жерге ватанэгьлийри и мукьвара хъсан чешнедалди успатна. Лугьун хьи, интернетдин девирда дуьньядин гьар са пипIе авай хуьруьнвияр, таяр-туьшер жагъур хъувун четин месэла туш. КIанзавайди ашкъини тешкиллувал хьун я.
Гьакъикъатдани, алай йисан 20-июлдиз за иштиракай мярекат адетдинди тушир. Докъузпара райондин Миграгъ-Къазмайрин тама авай ял ядай «Мегъуьн там» базада Миграгърин мектеб куьтягьайдалай инихъ 45 йис тамам хьуниз талукь яз санал кIелайбуру шадвилин межлис тешкилнавай.
Музыкадин алатар, чуьнгуьр гваз атанвай ашукь Къаира иштиракчийрин гуьгьуьлар акI шадарзавай хьи, гьар жуьре няметар, хуьрекар алай суфрадихъай нубатралди къарагъиз, кьуьлер ийиз, мярекат мехъерин хьтин гурлу межлисдиз элкъуьрнавай.
Инал за мярекатдин тешкилатчийрин тIалабуналди вири иштиракчийрин тIварар кьазва: Махачкъалада яшамиш жезвай Азиз Бислимов, ФСБ-дин ветеран, женгерин гьерекатрин иштиракчи, отставкада авай подполковник; Миграгъ-Къазмайрал яшамиш жезвай Шакир Жумартов, МВД-дин ветеран, отставкада авай подполковник; Москвада яшамиш жезвай Исретали Муслимов, карчи; Миграгъ-Къазмайрал яшамиш жезвай Мирим Баламетов, хуьруьн мектебдин директордин заместитель; Каспийскда яшамиш жезвай Минабидин Алисултанов, эцигунардайди; Ростовда яшамиш жезвай Феликс Саркаров, энергетик; Махачкъалада яшамиш жезвай Абдулталиб Жафаров, пенсионер; Елабугада яшамиш жезвай Сардар Саркаров, карчи; Миграгъа яшамиш жезвай Явер Гьажимурадов, пенсионер; Мегьарамдхуьруьн районда яшамиш жезвай Лачин Чигалиев, Мегьарамдхуьруьн почтадин отделенидин бухгалтер; Дербентда яшамиш жезвай Пирим Бекеров, пенсионер; Москвада яшамиш жезвай Шакир Мурадалиев, пенсионер; Миграгъ-Къазмайрал яшамиш жезвай Мизет Камалов, рекьерин карханадин кьилин инженер; Махачкъалада яшамиш жезвай Исрефил Ибрамхалилов, «Газпром» тешкилатда сменадин начальник; Миграгъ-Къазмайрал яшамиш жезвай Толик Багъиров, пенсионер; Дербентда яшамиш жезвай Самира Рагьимханова, «Магмус» тешкилатдин кьилин бухгалтер; Красноярскда яшамиш жезвай Секне Салигьова, Сибирдин юридический институтдин бухгалтер; Дербентда яшамиш жезвай Пернисе Керимова, муаллим; Миграгърин хуьре яшамиш жезвай Сара Гьажимурадова, пенсионер, игит-диде; Елабугада яшамиш жезвай Назлият Саркарова, пенсионер.
«Чна 1978-йисуз Миграгърин мектеб куьтягьна. Вири чун 50-далай виниз ксар авай. Яргъара авай гзафбуруз, рикIиз кIанзавайтIани, мярекатдиз хкведай кьисмет хьанач. Интернетдин куьмекдалди «ватцапда» санал кIелай таярин десте арадал гъана, чун сад-садав агудай Шакир Жумартоваз, чкадал мярекатдиз гьазурвал акур Исретали Ибрамхалиловаз чна пара сагърай лугьузва. Къенин важиблу мярекат и ксарин тешкиллувал себеб яз кьиле физва», – ихтилатна лишанлу гуьруьшдикай Азиз Бислимова.
Ватанда гуьзел тIебиатдал санал кIватI хьун, хуш суьгьбетарун, дагъларин чешмейрин цикай лезет хкудун, самовардин чай хъун, хъчадин афарар ва маса михьи суьрсетар дадмишун… ял ягъунин лап хъсан тегьеррикай сад я лагьайтIа, зи фикир инкардайбур бажагьат жеда.
К.Ферзалиев
