Алатай жуьмядиз “Дагъустан” РИА-дин конференц-залда Махачкъаладин бизнес-сообществодин (БИСОМ) руководитель Абдулла Пахрудиновахъ галаз республикадин журналистрин гуьруьш кьиле фена.
А.Пахрудинова ихтилат республикада базардин экономикадин шартIарал элячIиз гатIунай девирдилай, алатай асирдин 90-йисарилай башламишна. Адан гафаралди, алаш-булашдин а вахтунда бизнесдал машгъул жезвай карчийри, чпивай жедайвал кьил акъудиз кIвалахзавай. Кар алакьзавай ксар четинвилерай экъечIзавай, амайбур лап кIевера гьатзавай. Вири и йисара регионда карчивилин къат (класс) арадал атунин гьерекатар кьиле физвай. Кьве йис идалай вилик меркездин администрацияда карчиярни властдин органрин векилар кIватI хьанай ва анал республикада юкьван ва гъвечIи карчивал вилик тухунин рекьяй Совет тешкилнай.
Гуьгъуьнлай, гзаф алахъунар авурдалай кьулухъ, республикадин агъзурдав агакьна карчияр са залда кIватIнай, карчийрин садвал мягькемарунин къарар акъуднай, бизнес-сообществодин ассоциация тешкилнай.
А.Пахрудинова къейд авурвал, и жуьредин тешкилатар вири уьлквейра ава. Абуру, тайин тир дережадиз акъатайла, яшайишдин, политикадин, экономикадин хилера чпин итижар хуьзва.
— БИСОМ ассоциация къе вилик физвай мягькем къурулуш я ва адан жергеяр къвердавай къалин жезва. Чна вацра садра “Ким” тIвар алаз заседанияр кьиле тухузва. Анал жуьреба-жуьре хилерин карчияр гуьруьшмиш жезва, абуру чпи гъиле кьунвай крарикай хабар гузва, арадал къвезвай месэлаяр веревирдзава. Санал хьун къуват тирди карчийри аннамишнава ва абуру гьар са карчидив куьмек агакьарзава, — къейдна руководителди.
Ассоциация вилик финиз манийвалзавай пуд себеб ава, — лагьана ада. — Сад лагьайди, бизнесда чирвал авай пешекарар бес тахьун я. Аниз къвезвай чIехи пай карчивиликай хабар авачирбур жезва, гьаниз килигна абурун бизнесни яргъалди физвач. И месэла гьялун патал меркезда бизнес-школа кардик кутунва. Алай йисуз ана вири вузрай атанвай 120 студентди чирвилер къачуна. Абурукай карчивилел машгъул хьуниз 25 кас лайихлу хьана.
Кьвед лагьайди, республикада бегьем банкар тахьун я. Гьакъикъатда, республикада кардик квайди кьве банк я: “Сбербанк” ПАО ва “Россельхозбанк” ОАО. Гьавиляй республикадин юкьван ва гъвечIи карчивал еримлу авун патал чаз кьилдин банк герек я ва и месэлани чна гележегда гьялда.
Пуд лагьай себеб бизнес хуьнихъ галаз алакъалу я. Мукьвара республикадин карчийрихъ галаз кьиле фейи гуьруьшдани РД-дин Кьили и месэладиз еке фикир гана. Чи карчийри республикадин уьмуьрдин вири хилера еке кIвалах тухузва. Ассоциациядин къаюмвилик шегьердин са шумуд школа, аялрин бахчаяр ква, ада жегьилар кIвалах-дин чкайралди таъминарзава.
БИСОМ-дин руководителди журналистри ассоциациядин гележегдин кIвалахдиз талукь яз вилик эцигай суалриз жавабар гана.
Земфира Бабаева
