ЦIинин гату чав чимивилиз дурум гунин жигьетдай имтигьан вахкуз туна. И барадай гзафни-гзаф четинвал гьисс авурбур, комбайнидин штурвалдихъ, машиндин рулдихъ ацукьна, пакамлай няналди никIера кIвалахиз хьайи комбайнерар, шоферар я лагьайтIа, зун ягъалмиш жедач.
Сулейман-Стальский райондин Курхуьрелай тир тежрибалу шофер Эмирханов Равидинни гьахьтинбурун жергедик акатзава. Им сад лагьай йис туш и касди гатун азгар вахтунда техилар кIватI хъувунин важиблу карда иштиракиз. Адахъ и рекьяй 15 йисан тежриба хьанва. ЦIинин йис ам патал иллаки лишанлуди хьана. Вичин “Газ-53” маркадин автомашиндалди ада комбайнийрилай саки 90 тонндилай виниз къуьл чкадал хкана, арендаторринни жемятдин рикIер шадарна. Чкайрал хкай къуьл гьелбетда, яргъалди амбарра, ифин къачуна, амукьнач, арендаторри ам маса гана, чпизни къведай йисан бегьер патал тум яз ишлемишдайдини кьулухъ туна. Техил къунши хуьрерай атайбуруни маса къачуна. Лагьана кIанда, эхиримжи йисара агьалийри кIвалин къушар, кьилди къачуртIа верчер, уьндуьшкаяр, къазарни уьрдегар гзаф хуьзва. Куьчейра, вацIун кьерера аквадайбур абурун лужар я. Им, гьелбетда, лап хъсан кар я. Жуваз герек продукт жуван зегьметдалди чкадал гьасилун. Им гьукуматдин тIалабун — истемишунни я эхир.
Курхуьруьн агьалийри Равидиназ сагърай лугьузвайдини къейд тавуна жедач, гьикI лагьайтIа абурун хейлин дердияр ада вичин улакьдалди туькIуьрзава эхир. Ам чпин вахтунда колхоздани совхозда зегьмет чIугур Игит диде ФатIиматанни Фажрудинан чIехи хизанда тербияламиш хьанвай кас я.
Гад, гьелбетда, агудна куьтягьнава, чилери ял акъадарзава. Равидина лагьайтIа, эцигунардай материалар авай базайрихъ галаз алакъа хуьналди, инсанри анрай къачузвай тахта-шалман, сахсияр ва маса шейэр кIвалериз хутахиз куьмекар гузва. ГьакI хьайила Равидиназ вирида сагърай, аферин лугьузва. Къейд ийин хьи, адан стхайрик, миресрик шоферар мадни ква, санлай 8 кас.
«Лезги Газет»
