И йикъара Астрахань ше­гьер­дай чав шад хабар агакьна. Ана, государстводин медицинадин университетда, фадлай кIва­­­­лахзавай духтур-анестезиолог-реаниматолог, дуркIунрин азаррин рекьяй кафедрадин ассистент, кьепIирви хва  Казим Гьуьсейнович  Гьасанова  вичин пешекарвилин хиляй, инсандин дуркIунрин азарар алудиз, абур сагъардай цIийи ре­кьер­, дарманар, тадаракар, технологияр ахтармишиз, хейлин йисар тир. Гила а ахтармишунрин бинедаллаз мадицинадин илимрин кандидатвилин дережа хвенва. Диссертацийрин советдин къарардалди (17-ноябрь, 2022-йис, 73-нумра) ам тести­кьар­ни авунва.

Шадвалдай кар мадни ам я хьи, Казим Гьуьсейновича вичин диссертация гьа и вузда кIвалах­завай маса лезги хва, ери-бине Докъузпара райондин Мигра­гъай тир медицинадин илимрин доктор, профессор, машгьур хирург Элдар  Абдурагьимович  Кчибегован гъилик тамамарна, алимрин советдин вилик гъана.

Алимрин советдал рахай илимрин доктор О.С.Полунинади, илимрин кандидат И.В.Севастьяновади, масабуру жегьил алимдин кIвалахдиз виниз тир къимет гана, инсанрин сагъламвал хуьнин рекье адахъ авай метлебдикай, теклифзавай терапиядин цIийивиликай, виниз тир хийирлувиликай лагьана ва и агалкьун чи ватанэгьлийри (руководителди ва ассистентди) уьлкведин  медицинадин илимдик ва тежрибадик еке пай кутун тирди къейдна.

ТIварар кьунвай кьве ватан­эгьлидини, медуниверситетда студентриз чирвилер гузвайди хьиз, Астрахань шегьердин “РЖД — Медицина” тIвар алай больницадани хирургар яз кIва­лахзава, вишералди чпи са­гъар хъувур инсанрин патай гьуьр­мет ва авторитет къазанмишнава. Абурун тIва­рар, Россияда хьиз, къецепатан хейлин уьлквейрани машгьур я.

Чна чи кьегьал рухвайриз къачунвай дережаяр ва алукьзавай ЦIийи 2023-йис рикIин сидкьидай мубаракзава.

Чи халкьдин сагъламвилин къаравулда акъвазнавай квехъ къуй мадни агалкьунар хьурай!

Мерд Али Жалилов