РД-дин здравоохраненидин министерстводин делилралди, 8-февралдиз Да­гъустанда коронавирусдиз акси рапар 3007 касди янава. Иммунитет арадал гъизвай рапар ягъун патал вири республикада 54 пункт кардик ква.

Къейд авун лазим я хьи, къвердавай гзаф инсанри чпиз рапар ягъиз кIанзавайди раижзава, чеб ва чпин багърияр залан тIугъ­валдикай хуьз алахъзава. Сир туш, COVID -19 тIегъуьнди иллаки чпик яргъал­ди сагъариз тежезвай азарар квайбур лап четин гьалдиз гъизва, нетижаярни гзаф вахтара писбур жезва.

Сифте нубатда, рапар медицинадин хиле зегьмет чIугвазвайбуру, муаллимри, транспортдин ва къанун-къайда хуьдай къурулушда къуллугъзавайбуру, чпин кIва­­лах гзаф кьадар инсанрихъ галаз ала­къада аваз кьиле тухузвайбуру язава. Абу­рун арада республикадин районрин, шегьеррин кьиле авай ксарни ава.

И мукьвара Сулейман-Стальский райондин кьил Нариман Абдулмуталибовазни сифтегьанбурун жергеда аваз коронавирусдиз акси раб яна. 4-февралдиз ЦРБ-да адаз вакцинадин сад лагьай компонент янава, 21 йикъалай мад са раб ягъун герек я.

Раб ядалди вилик терапевт килигна, сатурация алцумна, да­мар­­ра ивидин гьерекат ва бедендин ифин ахтармишна. Гьазурвал акунин сергьятра аваз, ивидик коронавирусдин антитела кватIа, виликамаз анализ къачуналди чирна. И ахтармишуниз 3 югъ лазим атана.

Райондин кьилихъ галаз санал и юкъуз райадминистрациядин общественный хатасузвилин рекьяй кьилин заместитель Абуталиб Фатулаеваз ва образованидин управленидин начальник Гьуьсейн  Шихбабевазни рапар яна.

8-февралдиз Мегьарамдхуьруьн райондин кьил Фарид Агьмедовазни коронавирусдиз акси сад лагьай компонент квай раб яна. Райондин регьберди лазим тир ах­тармишунар виликамаз кьиле тухванвай. Раб ядалди виликни адан дамарра ивидин гьерекат ва бедендин ифин ахтармишна, терапевтди куьруь консультация тухва­на. Райондин регьберди вичин гьал хъсанзавайди къейдна, раб ягъуни адан кIвалах­диз ва санлай бедендин гьалдиз чIуру эсер авунвач. Адахъ галаз и рапар муниципалитетдин  идарайрин регьберрини яна.

Фарид Агьмедова райондин вири агьалийриз азардиз акси раб ягъуниз эвер гана. “Азарлу хьайи ксариз фендигар тIугъвалди гьикьван чIехи азаб, гьихьтин за­рар гузватIа чаз виридаз чизва. Гьавиляй чи хиве неинки са жуван сагъламвилин жигьетдай жавабдарвал авайдан, гьакIни чун патарив гвай ксарин патахъай къайгъударвал авун герек тирдан гъавурда акьун важиблу я”, — къейдна ада.

9-февралдиз Ахцегь райондин кьил Осман Абдулкеримовани ивидик  антитела кватIа чирдай анализ вахкана.

“Захъ коронавирусдиз акси раб ядай ният ава. За хьиз, и анализ зи бубади ва дидедини вахкана, абурузни азардиз акси раб ягъиз кIанзава.

Са шумуд варз идалай вилик чахъ ихь­тин мумкинвал авачир. Къе лагьайтIа, чахъ азардикай хуьн патал иммунитет арадал гъидай такьат ава. Коронавирусдин тIугъвалдин фендигарвал фикирда кьуналди, чна чи ва багърийрин сагъламвал хуьз куьмекдай менфятлу серенжемар кьабулун лазим я”, — лагьана Осман Абдулкеримова.

«Лезги газет»