— ДуркIунра куьлуь къум авайла, 1 кг дувуларни галамай петрушка ва сельдерейдин са дувул куьлуь авуна, аниз 1 кг вирт, 1 л яд алава хъувуна, зайиф цIал эцигна, хуькуьриз-хуькуьриз звал гъана, 3 юкъуз тада, ахпа аниз мад са литр яд алава хъувуна, звал хкана, къаришма рекъидалди тадиз куьзда. Фу недалди вилик хуьрекдин пуд тIуруна авайди ишлемишда.
— Мекьи хьана, азарлу хьанвайла, еке кьил чичIек ракьай яна, адакай шире хкудна ва аниз вирт алава хъувуна (сад хьтин паяр), вири са-садак хъсандиз хуькуьрна, йикъа пуд сеферда фу недалди вилик хуьрекдин са тIуруна авайди кудай некIедихъ галаз хъвада. 2-3 йикъалай уьгьуьяр хкатда.
— Ивидин гемоглобин тIимил хьайила, ихьтин къаришмади куьмек гуда. Са стаканда авай газаррин, чугъундуррин ва чIулав турпунин мижеяр вири сад-садак какадарна, 200 г вирт ва са лимондин миже алава хъувуна, холодильникда хуьда. Йикъа пуд сеферда, фу недалди вилик са сят амаз, хуьрекдин са тIуруна авайди ишлемишда. Ихьтин къаришмади ивидин гьерекат къайдадик кухтада.
— МетIен кIвалакIра кьелер акъвазнавайла (артроз), 1 кг хрендин дувулар чуьхвена, михьна, як регъведай машиндай авадарна, миже хкудда. Адакай 250 гр майонездин банкада авайди жеда, аниз хуьрекдин са тIуруна авай вирт вегьена, хъсандиз хуькуьрда. Ахпа йикъа са сеферда фу недалди вилик 30 декьикьа амаз чайдин са тIуруна авайди ишлемишда. Сагъ хъхьунин вахт са варз я. Варз ара гана, курс тикрар хъийида, ахпа мад са варз ара гана, курс тикрар хъийида. Дарман лап хийирлуди я. Миже анжах къайи чкада хкуьн меслят къалурзава.
— Хуквада тIал аваз, рикI кудайла, йикъа пуд сеферда фу недалди вилик са стакандин кьатIа авай келемдин чими миже ишлемишун меслят къалурзава.
— Кьил къатидаказ тIазвайла, са кьил серг регъвена, шуьшедин къапуниз вегьена, са стакан михьи тавунвай набататдин ягълу илична, холодильникда эцигда. Ам и жуьреда ишлемишда: чайдин са тIуруна авай лимондин мижедик гьакьван ягълу акадарда, ахпа ам йикъа пуд сеферда фу нез 30 декьикьа амаз ишлемишда. Ихьтин такьатди кьилин ва рикIин агаж хьанвай дамарар ачухарда.
— Жалгъаяр тIазвайла сабельник болотный хъчади хъсан куьмек гуда. Ада жалгъайрин тIал секинарда,беденда кIватI хьанвай кьелер акъудда, иммунитет мягькемарда, иви михьи ийида.
Адан настойка икI гьазурда: сабельникдин куьлуь авунвай дувулар чуьхвена, 0,5 л банкадин са кьатIаз вегьена, винелай банка ацIудалди эрекь илична, 21 юкъуз чими ва мичIи чкада эцигда. Ахпа ам куьзна, йикъа 5 сеферда фу нез 15-30 декьикьа амайла хуьрекдин са тIуруна авайди ишлемишда.
— Япарин сес зайиф хьанвайла, хуьрекдин 10 тIуруна авай инжи векьин цуькверал 0,5 л эрекь илична, 10 суткада тада, ахпа куьзна са вацран вахтунда фу недалди вилик чайдин са тIуруна авайди хъвада.
Гьазурайди — Надият Велиева
