Вичихъ хейлин агалкьунар авай спортдин хъсан устад ва насигьатчи-тренер Юсиф Пиров 1983-йисуз Баку шегьерда дидедиз хьана ва ана мектебни куьтягьна. Спортдал лагьайтIа, 12 йисан яшда авайла машгъул жез гатIунна.
Кунг-фудал, тайский боксдал, самбодал, каратэдал, кикбоксингдал машгъул хьайи пагьливандихъ и хилерай акъажунра къазанмишай гъалибвилерни авачиз туш. 2005-йисуз ватанэгьлидикай Иранда кунг-фудай кьиле фейи дуьньядин чемпионатдин гъалибчи, 2008-йисуз Киевда женгинин самбодай дуьньядин чемпионатдин ва 2009-йисуз Free-Fightinqu жуьредай Гуржистанда кьиле фейи акъажунрин приздин сагьиб хьана.
Спортдин текба-тек женгерал рикI алай пагьливан тренервилин кIвалах кьиле тухунив эгечIна. Юсиф Пирова сифтедай Бакуда тренер яз кIвалахна, гуьгъуьнлай Москвада яшамиш хьана ва ана кикбоксингдин, тайский боксдин ва текба-тек женгерин тренер яз (2010-2017-йисара) кIвалах давамарна. Спортдин сирерай хъсандиз кьил акъудиз жезвай пешекар тирвиляй Юсиф хьтин тренеррин игьтияж вири чкайра ава.
2018-йисуз вичин багърияр авай Баку шегьердиз хтуниз мажбур хьайи Юсифа ана жуьреба-жуьре спортдин клубра администратор яз кIвалахна. Алакьунар авай пешекар тирди чир хьайила, дуьньядин чемпион З.Самедова адаз вичин цIийи ва машгьур клубда кIвалахун теклифна. ИкI, 2019-йисан апрелдилай ватанэгьлиди Баку шегьерда авай З.Самедован тIварунихъ галай женгерин искусстводин мектебда тайский боксдин тренервиле кIвалахзава. Адахъ международный классдин тайский боксдин тренервал тестикьарзавай шагьадатнама ава. Адан алахъунрин нетижаяр сухтайри къазанмишзавай агалкьунри къалурзава.
— Спортдив гьевесдивди эгечIна кIанда. Сир туш хьи, сагъламвал мягькемарунин фикир авай касдиз спортдал машъул хьун хъсан я, — лугьузва Юсифа.
Юсифа, сагълам уьмуьрдин таблигъатчиди хьиз, интернетдин соцсетрани инсанар спортдал желб хьуниз таъсирдай келимаяр кхьизва, вичихъ ва сухтайрихъ жезвай агалкьунрикай, кьиле тухузвай мастер-классрин видеокхьинарни халкьдин арада раижзава. Мадни агалкьунар хьурай чи ватанэгьлидихъ!
К.Ферзалиев
